Kanadalyq sportshylar «Almatyǵa rahmet» degen jazý alyp shyqty

ALMATY. QazAqparat -  Almatyda aıaqtalǵan 28-shi Búkilálemdik qysqy Ýnıversıadanyń jabylý saltanatty sharasyndaǵy sportshylar sherýinde kanadalyq sportshylar «Almatyǵa rahmet» degen jazýy bar plakat alyp shyqty, dep habarlaıdy QazAqparat.

Búgin Almatyda 28-shi Búkilálemdik qysqy Ýnıversıadanyń jabylýy ótip jatyr.

Oǵan 57 elden 2000 myńǵa jýyq sportshy qatysyp jatyr.

Jabylý saltanaty 80 elde, 1 mlrd-qa jýyq kórermenge translıatsııalanyp otyr. 

Saltanatty sharaǵa QR Úkimet basshysy Baqytjan Saǵyntaev, Halyqaralyq stýdentter sporty federatsııasynyń Prezıdenti Oleg Matytsın, Almaty ákimi Baýyrjan Baıbek jáne kelesi Ýnıversıada oıyndaryn ótkizetin Reseıdiń Krasnoıarsk ólkesiniń basshylyǵy qatysýda.

Ýnıversıadanyń jabylý rásimi jeztańdaı ánshi Ardaq Balajannyń án shashýmen bastaldy. Kelesi kezekte Jámılá Serkebaeva skrıpkada  Túrkeshtiń «Kóńil ashar» kúıimen árleı tústi. Al «Ulytaý toby» Mahambettiń «Jumyr qylysh» kúıin  tógiltti.

Aıta keteıik, Ýnıversıada oıyndaryna 85 medal jıyntyǵy sarapqa salyndy. Jalpy komandalyq esepte Reseı komandasy birinshi oryn aldy. Olardyń enshisinde 28 alty,  27 kúmis jáne 15 qola medal bar. Ekinshi orynda Qazaqstan quramasy. Bizdiń sportshylar baıraqty básekede 11 altyn,  8 kúmis jáne  17 qola jeńip aldy. Úzdik úshtikti Ońtústik Koreıa túıindedi. Bul eldiń sportshylarynda 11 altyn, 5 kúmis jáne  5 qola medal bar.