Kanadalyq kompanııa Qazaqstanda suıytylǵan tabıǵı gaz óndirý zaýytyn salýdy kózdep otyr

NUR-SULTAN. QazAqparat - Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi Kanadanyń «Condor Petroleum» munaı-gaz kompanııasynyń Basqarýshy dırektory Norman Stormmen kezdesti, dep habarlaıdy QazAqparat.

QR Syrtqy ister mınıstrliginiń resmı saıty taratqan aqparatqa qaraǵanda, taraptar daǵdarystan keıingi kezeńde ekonomıkany damytý, Qazaqstanda bıznes júrgizý jáne ınvestıtsııalar jónindegi keń aýqymdy máselelerdi talqylady. «Condor Petroleum» Qazaqstanda suıytylǵan tabıǵı gaz óndirý zaýytyn salý boıynsha ınvestıtsııalyq jobany iske asyrýǵa múddeli.

Kompanııa Qazaqstannyń munaı-gaz salasynda 20 jyldan astam jumys isteıdi. Qazirgi ýaqytta Aqtóbe oblysyndaǵy Jarqamys ken ornynda munaı óndirý jobasy iske asyrylýda. Búginde «Condor Petroleum» el ekonomıkasyna 250 mln. astam AQSh dollaryn ınvestıtsııalady.