Kanadada Qazaqstan kúni ótýde

TORONTO. QazAqparat –Torontodaǵy paıdaly qazbalardy barlaý jáne óndirý boıynsha PDAC álemdik kórme-konferentsııasynyń aıasynda búgin Qazaqstan kúni ótip jatyr. Bul týraly QazAqparat IIDM silteme jasap habarlaıdy.

QR Indýstrııa jáne ınfraqurylymdyq damý, QR Ekologııa, geologııa jáne tabıǵı resýrstar, QR Syrtqy ister mınıstrlikteriniń, «Aurora Minerals Group» MK, «Rio Tinto», AIX, «Qazmyrysh» AQ ókilderi sharany onlaın formatta ótkizedi.
Jyl saıynǵy PDAC konferentsııasy - aǵymdaǵy máseleler, perspektıvalyq naryqtar, salalyq úrdister jáne jańa tehnologııalar talqylanatyn álemdik taý-ken óndirý salasy úshin jetekshi is-shara. Kórme álemniń ár buryshynan ınvestorlardy, sarapshylardy, taý-ken salasynyń jetekshilerin, geologtar men memlekettik qyzmetshilerdi tartady.
«Kazakhstan Day» aıasynda Qazaqstannyń memlekettik organdary men ulttyq kompanııalarynyń ókilderi konferentsııa qatysýshylaryna elimizdiń mıneraldyq resýrstary naryǵynyń bolashaǵy, ınvestorlar men bıznes úshin jańa múmkindikter, zańnamadaǵy jańalyqtar, sondaı-aq ınvestorlardy qoldaý sharalary men Qazaqstan naryǵyndaǵy jumys erejeleri týraly aıtyp berdi.
Konferentsııada QR Indýstrııa jáne ınfraqurylymdyq damý vıtse-mınıstri Rýslan Baımıshev batys-avstralııalyq modelge negizdelgen jańa zańnamany iske asyrýdyń qysqa kezeńinde Qazaqstanda geologııalyq barlaý salasynda kompanııalar damyp kele jatqanyn atap ótti. Birinshi kezekte, bul lıtsenzııa alý protsesin aıtarlyqtaı ońaılatýmen baılanysty. Máselen, 2 jyl ishinde 1200-den astam jer qoınaýyn paıdalaný quqyǵy berildi.