Kanadada Astanaǵa arnalǵan bestsellerdiń tusaýkeseri ótti

ASTANA. QazAqparat - 2017 jylǵy 25 mamyrda Kanadada Manıtoba Ýnıversıtetiniń professory Frank Albonyń «Astana: Sáýleti, jumbaǵy, taǵdyry» atty kitabynyń resmı tusaýkeseri ótti, dep habarlaıdy QR SІM baspasóz qyzmeti.

Manıtoba provıntsııasynyń astanasy Vınnıpeg qalasynda ótken is-sharaǵa Qazaqstan Respýblıkasynyń Kanadadaǵy Elshisi Konstantın Jıgalov, Manıtoba Mádenıet mınıstri Roshel Skvaıers, Qarjy mınıstri Kameron Frızen, provıntsııa Parlamentiniń depýtattary jáne shamamen 400 qoǵam qaıratkerleri qatysty.

Qatysýshylardyń aldynda sóılegen sózinde K. Jıgalov kitap avtoryn Qazaqstannyń tarıhy men mádenıetin sáýlet turǵysynan zerttegen ǵylymı jobanyń sátti aıaqtalýymen quttyqtap, Kanada tarıhyndaǵy alǵashqy Qazaqstanǵa arnalǵan kitaptyń 2017 jyly basyp shyǵarylýynyń orny erekshe ekendigin atap ótti. «Bıylǵy jyly Qazaqstan men Kanada arasyndaǵy dıplomatııalyq qarym-qatynastarǵa 25 jyl, Prezıdent Nursultan Nazarbaev bas arhıtektory bolyp sanalatyn Astana qalasynyń elorda atanǵanyna 20 jyl tolyp otyr. Bul kitap «EKSPO-2017» halyqaralyq mamandandyrylǵan kórmesiniń ashylýy qarsańynda jaryq kórýde. Professor F. Albo týyndynyń jeke bóligin oǵan arnap otyrǵany belgili», - dedi K. Jıgalov.

Sonymen qatar, Qazaqstan Elshisi elimizdiń áleýmettik-ekonomıkalyq damýy, sondaı-aq negizgi jetistikteriniń biri -jańa astananyń qurylýy ekendigin, elimizdiń jańǵyrtylýynyń basty qadamdary týraly jan-jaqty habardar etti. Memleket basshysynyń bastamasymen iske asyrylyp jatqan qoǵamdyq sanany jańǵyrtý jáne «Týǵan jer» baǵdarlamasy aıasyndaǵy «Qazaqstannyń kıeli jerleri» jobasyn eskere otyryp, avtordyń kótergen taqyryptardyń ózektiligine de erekshe nazar aýdaryldy.

Kanada jurtshylyǵy «Astana: Sáýleti, jumbaǵy, taǵdyry» kitabyna shynymen qyzyǵýshylyǵyn tanytyp, qazirgi kezde onyń alǵashqy tırajy (4500 dana) tolyǵymen satyldy. Kitap Kanadanyń resmı bestselleri ataǵyna ıe boldy.

F.Albo is-sharaǵa jınalǵan jurtshylyqty kitaptyń resmı saıty (www.astanamyth.com), «ATOM» jobasymen birge iske asyrylyp jatqan ıadrolyq qarýǵa tyıym salý jónindegi onlaın naýqan, sondaı-aq aldaǵy ýaqytta London, Vashıngton, Ottava qalalarynda jáne Astanadaǵy «EKSPO-2017» sheńberinde arnaıy tusaýkeser uıymdastyrý týraly óz josparlarymen tanystyrdy.