Kanada munaı-gaz kompanııalary Qazaqstanǵa ınvestıtsııa salmaq

ALMATY. QazAqparat - Kanadadaǵy Alberta provıntsııasynyń 14 kompanııasy Qazaqstanda óz kompanııalaryn ashyp, elimizdiń  munaı gaz jáne energetıka salasyna ınvestıtsııa quıýǵa daıyn. Bul týraly búgin baspasóz máslıhatynda Kanadadaǵy Alberta provıntsııasy úkimetiniń saýda men ınvestıtsııa boıynsha bas dırektory Loran Oje aıtty, dep habarlaıdy QazAqparat tilshisi.

Almatyǵa Kanada delegatsııasy «KEOGE» - «Munaı jáne gaz» qazaqstandyq halyqaralyq munaı jáne gaz kórmesi aıasynda keldi.

«Alberta - Kanada munaı gaz energetıka salasy damyǵan 10 provıntsııanyń biri. Munda munaı men gaz óndirý  asa damyǵan tehnologııalarmen júzege asady. Biz osy saladaǵy múmkindikterimizdi sizderge kórsetsek dep edik. Sonymen qatar, Qazaqstannyń tájirıbesi de bizge artyq etpes edi. Kórme aıasyndaǵy eki jaqty tájirıbe almasýdan soń kanadalyq kompanııalar Qazaqstanda óz ókildikterin ashatyndyǵyna senimdimin», - dedi L. Oje.
 

Aıta ketý kerek, kanadalyqtar osydan 4 jyl buryn Qazaqstanda óz ókildikterin ashqan bolatyn.

«2014 jyly munaı-gaz salasynda 2 kanada kompanııasy óz ofısterin ashty. Sol jyly munaı salasynda daǵdarys boldy da ofıster jabylyp qaldy. Osy jyly jaqsy tájirıbe bolady degen úmittemin. Biz Qazaqstannyń munaı-gaz salasyna ınvestıtsııa salýǵa daıynbyz», - dedi ol.

Konferentsııa Kanada-Qazaqstan iskerlik keńesiniń aıasynda Kanadanyń Reseı men Eýrazııadaǵy iskerlik qaýymdastyǵynyń uıtqy bolýymen ótti.

Shara barysynda kanadalyq delegatsııa men «Kazenergy» qazaqstandyq qaýymdastyǵy arasynda ózara yntymaqtastyq týraly kelisimge qol qoıyldy.