Kanada men Úndistan saıası kisi ólimine baılanysty halyqaralyq janjalǵa tap boldy

<p><span style="font-family: sans-serif; font-size: 18px;">Sıkhterdiń jetekshisi Hardıp Sıngh Nıdjardyń Kanada aýmaǵynda óltirilýine baılanysty Úndistan men Kanada arasynda halyqaralyq janjal shyqty, dep habarlaıdy QazAqparat </span><span style="font-family: sans-serif; font-size: 18px;"><a href="https://edition.cnn.com/2023/09/18/americas/canada-hardeep-singh-nijjar-india-intl/index.html" target="_blank" rel="noopener">CNN</a> agenttigine silteme jasap.</span></p>

Kanada premer-mınıstri Djastın Trıýdo eldiń barlaý qyzmetterinde Nıdjardyń ólimin Úndistanmen baılanystyratyn «senimdi» dálelder bar dep málimdegennen keıin Kanada Úndistannyń joǵarǵy dárejeli dıplomaty Pavan Kýmar Raıdy elden shyǵardy.

«Sońǵy birneshe apta ishinde Kanadanyń qaýipsizdik qyzmeti Úndistan úkimetiniń agentteri men Kanada azamaty Hardıp Sıngh Nıjardyń ólimi arasyndaǵy yqtımal baılanys týraly senimdi málimdemelerdi belsendi túrde zerttedi», - dedi Trıýdo dúısenbi kúni Parlamentte.

Sonymen qatar, onyń úkimeti «osy kisi ólimine qatysy bar adamdardy jaýapqa tartý» úshin búkil tıis sharalardy qabyldaıtynyn aıtty.

Kanadanyń syrtqy ister mınıstri Melanı Djolı úndistandyq dıplomattyń elden shyǵarylǵanyn rastady, ol da Nıdjardyń Kanadadaǵy úndi barlaý qyzmetiniń basshysy ekenin atap ótti.

Nıdjar brıtandyq Kolýmbııa provıntsııasyndaǵy kórnekti sıkh kóshbasshysy bolǵan. Jergilikti polıtsııanyń málimetinshe, ony osy maýsymda Sýrreıdegi sıkh hramynyń janynda betperde kıgen eki qarýly adam júk kóliginde atyp óltirgen.

Onyń qazasy júz myńdaǵan adamnan turatyn Kanadadaǵy sıkh qaýymdastyǵyn dúr silkindirip, ashýyna tıdi.

Birneshe jyl buryn Úndistan Nıdjardy sıkhızm separatıstik qozǵalysynyń múshesi dep atap, terrorıstik qaýip tóndirýi múmkin ekenin jarııalaǵan. 

Trıýdo sonymen qatar ótken aptada G20 sammıtinde Úndistan premer-mınıstri Narendra Modımen jeke sóıleskende Nıdjardyń ólimi máselesin kótergenin aıtty.

«Kez kelgen sheteldik úkimettiń Kanada jerinde kanadalyq azamatty óltirýge qatysýy - bizdiń egemendigimizdi buzý bolyp sanalady», - dedi ol.

Aıta keteıik, ázirge kanadalyq polıtsııa Nıdjardyń ólimine qatysty eshkimdi qamaýǵa alǵan joq.

Seısenbide Úndistannyń Syrtqy ister mınıstrligi málimdeme jasap, Kanada premer-mınıstriniń talaptaryn joqqa shyǵardy, dep habarlaıdy BBC News.

«Úndistan úkimetiniń Kanadadaǵy qandaı da bir zorlyq-zombylyq áreketine qatysy bar degen aıyptaýlar aqylǵa qonymsyz», - dedi Úndistan mınıstrligi.