Kanada elshisi Qazaqstandaǵy dıplomatııalyq qyzmetin aıaqtady

NUR-SULTAN. QazAqparat – Qazaqstan Respýblıkasy Syrtqy ister mınıstriniń orynbasary Erlan Álimbaev bizdiń eldegi dıplomatııalyq mıssııasynyń aıaqtalýyna baılanysty Kanada elshisi Nıkolıa Brýssony qabyldady, dep habarlaıdy QazAqparat.

Kezdesý barysynda suhbattasýshylar Qazaqstan men Kanada arasyndaǵy saýda-ekonomıkalyq ózara is-qımyldyń mańyzdy salalary - aýyl sharýashylyǵy jáne jer qoınaýyn paıdalaný, akademııalyq almasý, sondaı-aq KazAid jáne CIDA eki eldiń halyqaralyq damý agenttikteri arasyndaǵy yntymaqtastyqty atap ótti.

Taraptar 2021 jylǵy naýryzda eki eldiń syrtqy saıası vedomstvolary basshylarynyń orynbasarlary deńgeıindegi saıası konsýltatsııanyń tabysty ótkenine toqtaldy.

Osy turǵyda elshiniń ekijaqty saıası, saýda-ekonomıkalyq jáne mádenı-gýmanıtarlyq qatynastardy damytýǵa qosqan eleýli úlesi atap ótildi.

N.Brýsso Kanadanyń Qazaqstandaǵy elshisi qyzmetinde tórt jyl qyzmet atqardy, osy jyldar ishinde kóptegen salalarda ekijaqty baılanys nyǵaıdy.

Kanada Qazaqstannyń 10 iri sheteldik ınvestorynyń qataryna ene otyryp, búgingi kúnge deıin 6 mlrd AQSh doll. astam kólemde elimizge ınvestıtsııa saldy.

N.Brýssonyń ekijaqty baılanystardy damytýǵa qosqan jeke úlesin eskere otyryp, kanadalyq dıplomatqa QR Prezıdentiniń Alǵys haty tabys etildi.