Qan maıdanda ot keshken 528 qazaqstandyq Keńes Odaǵynyń Batyry jaıly serıal túsirilmek

ALMATY. QazAqparat - Uly Otan soǵysynda ot keshken 528 qazaqstandyq Keńes Odaǵynyń Batyry jaıly serıal túsirilmek. Bul týraly QR «Generaldar keńesi» respýblıkalyq qoǵamdyq uıymy prezıdıýmynyń tóraǵasy, ádilet general-maıory, professor Rústem Qaıdarov málim etti.

«Qatary sırep bara jatqan batyrlarymyz jaıly derekti kıno túsirý kópten beri oıymyzda júr. Qazaq KSR-nyń Ekinshi dúnıejúzilik soǵysqa qosqan úlesi jaıly fılmge ár batyrdyń ómiri men eńbegi jaıly 3-9 mınýttyq úzindi qosylady. Biz ár oblystaǵy memlekettik organdar men arhıv qyzmetkerlerin kómektesýge shaqyramyz. Óıtkeni, qazir bizge ár oblystan batyr ataǵyndaǵy qansha kóshe, aýyl bar ekenin, qandaı sporttyq jáne mádenı týrnırler ótkizil turatyny jaıly aqparat qajet», - dedi QR «Generaldar keńesi» respýblıkalyq qoǵamdyq uıymy prezıdıýmynyń tóraǵasy, ádilet general-maıory, professor Rústem Qaıdarov.

Qazir 510 keńes odaǵynyń batyry jaıly málimetter tolyq jınalǵan. QR ІІM atalǵan jumysqa jergilikti ýchaskelik ınspektorlardy jumyldyryp otyr.

«Ekinshi dúnıejúzilik soǵysqa barlyǵy 72 memleket qatysyp, 60 mln. adam ajal qushqan, 110 mln. adam jaralandy. Al Qazaqstannan qan maıdanǵa 1 200 000 adam attandy. Onyń ishinde 600 myń adam maıdanda qaza boldy. Bir ǵana Shyǵys Qazaqstan oblysynan 111 Keńes Odaǵynyń Batyry shyqqan. Osydan-aq, Qazaqstannyń otanyn qorǵaýǵa qosqan úlesiniń zor ekendigin kórýge bolady», - dep qorytyndylady general-maıor Rústem Qaıdarov.