Qamshybek Qońqabaev WBO tıtýly úshin aıqas aldynda salmaq ólshedi
13:16, 26 Aqpan 2021
ALMATY. QazAqparat. - Almatyda 27 aqpanda ótetin MTK Fight Night týrnırine qatysýshylardyń salmaǵyn ólsheý rásimi ótti. Bul týraly «QazAqparat» Sports.kz-ke silteme jasap habarlaıdy.
Keshtiń basty jekpe-jeginde Qazaqstan quramasynyń kapıtany Qamshybek Qońqabaev (2-0, 2 KO) birinshi aýyr salmaqtaǵy WBO Asia Pacific chempıony bos ataǵy úshin Ýkraına ókili Server Emýrlaevpen (23-1, 9 KO) judyryqtasady. Eki qarsylas ta óz sanattarynyń lımıti - 90,7 keliden aspady.
Esterińizge sala keteıik, bastapqyda qazaqstandyqtyń qarsylasy soltústik ırlandııalyq boksshy Stıven Ýord (13-1, 4 KO) bolýy kerek edi. Biraq ol jeke sebeptermen urystan shyǵýǵa májbúr boldy.
Sondaı-aq shoý aıasynda rıngke ózge de qazaqstandyq jáne sheteldik boksshylar shyǵady. Týrnır 27 aqpanda Nur-Sultan ýaqytymen 17:00-de bastalady. Tikeleı efır Sporttimekz jáne IFL TV YouTube arnalarynda, sondaı-aq ESPN arnalarynda kórsetiledi.