Qamshybek Qońqabaev Azııa oıyndarynyń 1/2 fınalyna ótti

<p>Qytaıdyń Hanchjoý qalasynda ótip jatqan Azııa oıyndarynda qazaqstandyq boksshy Qamshybek Qońqabaev jartylaı fınalǵa joldama aldy, dep habarlaıdy&nbsp;<a href="https://kaz.inform.kz/" target="_blank" rel="noopener">QazAqparat tilshisi.</a></p>

Qazaqstandyq boksshy asa aýyr salmaq sanatynda bahreındik Danıs Latypovpen kúsh synasty.

Qamshybek úshinshi raýndta nokdaýn alyp qalǵanyna qaramastan, qarsylasyn utty. Tóreshiler esebi – 5:0.

Osylaısha, Q.Qońqabaev keminde qola medal alady.

Bokstan Qazaqstan erler quramasynyń bas bapkeri Myrzaǵalı Aıtjanov Qamshybektiń jekpe-jegi týraly pikir bildirdi. "Qarsylasy - Azııadaǵy myqtylardyń biri. Kezdesý tartysty boldy. Kem-ketik te bolmaı qalǵan joq, bir-eki soqqy jiberip aldy. Munyń bári - aldaǵy kezdesýlerge daıyndyq", – dedi ol.

Búgin Jaına Shekerbekova 54 kelige deıingi salmaqta úndistandyq Prıtıge 1:4 esebimen jol berip, júldesiz qaldy.

Keshki sessııada Qazaqstannan taǵy úsh boksshy rıngke shyǵady.

Eske sala keteıik, budan buryn Saǵyndyq Toǵambaıdyń Azıadanyń jartylaı fınalyna shyqqanyn jazǵan bolatynbyz.

QR sportshylary 30 qyrkúıekte qatysatyn jarystar kestesin buǵan deıin usynǵan edik. Búgin úsh otandasymyz fınalǵa shyqty.