Qamqor qazaqstandyqtardyń arqasynda biz el damýynyń júıeli máselelerin sheshe alamyz – Erlan Qarın
«Ortalyqtaǵy jáne jergilikti jerdegi memlekettik organdar qazir sý tasqynynyń zardaptaryn joıýǵa, jaǵdaıdyń ýshyǵýyna jol bermeýge tolyqtaı jumyldy. Barlyq tıisti memlekettik organdar men qyzmetter, ákimdikter táýlik boıy jumys istep jatyr. Qutqarý jumystaryna barlyǵy 9 myńnan astam adam men 2 myńnan astam tehnıka jumyldyryldy. Sý tasqyny bastalǵannan beri zardap shekken 11 aımaqta 19 myńnan astam adam, onyń ishinde 8 myń bala qutqarylyp, evakýatsııalandy. Memleket basshysy men Úkimet deńgeıinde jedel keńester turaqty túrde ótkizilip turady. Prezıdent eń jaqyn emes, tabıǵı apat eń kóp taraǵan shalǵaı óńirlerdiń birine ushyp ketti. Qasym-Jomart Toqaev osyndaı qıyn-qystaý sátterde árdaıym oqıǵa ornyna baryp, jaǵdaıdy jeke baqylap, azamattarǵa qoldaý kórsetip otyrady. Budan basqa, qabyldanyp jatqan sharalar men aǵymdaǵy jaǵdaı týraly halyqty úzdiksiz habardar etý úshin Respýblıkalyq aqparattyq shtab quryldy. Shtabtyń táýlik boıy jumysy Úkimettiń jedel shtabynyń qyzmetimen úılestiriledi jáne ony Prezıdent Ákimshiligi úılestiredi», - dep jazdy Erlan Qarın Telegram-da.
«Osynyń barlyǵynda azamattarymyzdyń yntymaǵy men jaýapkershiligi aıqyn ańǵarylady. Otandastarymyzdyń osyndaı belsendi qatysýy men qamqorlyǵynyń arqasynda biz tótenshe jaǵdaılarǵa tıimdi qarsy turyp qana qoımaı, el damýynyń júıeli máselelerin sheshe alamyz», - dedi E.Qarın.
QR Memlekettik hatshysy atap ótkendeı, dıalog alańdarynyń arqasynda sońǵy jyldary memleket pen qoǵam kóptegen ózekti máselelerdi sheshýdiń ońtaıly joldaryn syndarly túrde ázirlep jatyr.
«Memleket basshysynyń bastamasymen qolǵa alynǵan azamattar jáne mınıstrler men ákimder arasyndaǵy kezdesýlerdiń dıalogtyq formaty tıimdi quralǵa aınaldy. Jańa erejeler boıynsha saılanǵan Parlament pen máslıhat depýtattary belsendi jumys isteýde, olarǵa qoıylatyn talap deńgeıi aıtarlyqtaı artty. Atap aıtqanda, sý tasqynynyń alǵashqy kúnderinen bastap Parlament depýtattary men Ulttyq Quryltaıdyń depýtattary azamattarmen turaqty baılanysta bolyp, zardap shekken aımaqtardy aralap, sol jerlerde kezdesýler ótkizip, oblystyq shtabtardyń jumysyna atsalysty. Mundaı birlesken áreketter nátıje beredi. Barlyq dıalog alańdarynyń, sondaı-aq depýtattar men qoǵam belsendileriniń áleýeti aldaǵy ýaqytta ınfraqurylymdy qalpyna keltirýge jáne zardap shekkenderge kómek kórsetýge jumsalatyn qarajattyń tıimdi jumsalýyn baqylaýǵa tartylady. Birlik pen yntymaq qundylyqtary – mádenıetimiz ben dilimizdiń ózegi. Osy qundylyqtardy ustaný arqyly biz kez kelgen qıyndyqty jeńip, eldi jańǵyrtý jolynda birlese jumys jasaı alamyz», – dep túıindedi sózin E.Qarın.