Kámeletke tolmaǵandar jasaǵan qylmystar 18,8 paıyzǵa tómendedi - Bas prokýratýra

ASTANA. QazAqparat - 2014 jyldyń 10 aıynda elimizdegi tirkelgen qylmystar deńgeıi ótken jyldyń osyndaı kezeńimen salystyrǵanda 4,5 paıyzǵa (300 889-dan 287 311-ge) tómendedi.

«Qylmystylyq barlyq túrleri boıynsha tómendegen, olardyń ishinde asa aýyr qylmystar - 17,7 paıyzǵa (2 270-ten 1 868-ge), aýyr qylmystar - 19,1 paıyz (29 586-dan 23 925-ke), aýyrlyǵy ortasha qylmystar - 2,2 paıyz deńgeıinde ( 232 070-ten 226 940-qa), aýyr emes qylmystar 6,5 paıyzǵa (36 963-ten 34 578-ge) azaıǵan», - dep atap ótilgen QR Bas prokýratýrasy Quqyqtyq statıstıka jáne arnaıy esepke alý jónindegi komıteti baspasóz qyzmetiniń málimetinde.

Qylmystyń aldyn alý jónindegi memlekettik organdardyń áreketin úılestirý qylmystylyq quramynyń negizin quraıtyn qylmystardyń tómendeýine yqpal etti, máselen, urlyq - 1,9 paıyzǵa, onyń ishinde úıge ury túsý - 3,3 paıyzǵa, buzaqylyq -14,3 paıyzǵa, tonaý - 25,4 paıyzǵa tómendegen. Bulardyń barlyq jasalǵan qylmystar ishindegi ózindik úlesi 71 paıyzdy quraıdy.

Alkogoldik ishimdikke jáne esirtkige eltigen kúıinde jasalǵan qylmystar - 1,7 paıyzǵa, kámeletke tolmaǵandar jasaǵan qylmystar - 18,8 paıyzǵa, kóshedegi qylmys - 9 paıyzǵa jáne qaıtalama qylmys - 3,8 paıyzǵa azaıdy.

«Álemde naqty krımınogendik jaǵdaıdy baǵalaıtyn ındıkatorlar da qylmystyń tómendegenin kórsetip otyr. Máselen, kisi óltirý sany - 16,7 paıyzǵa, qaraqshylyq - 35 paıyzǵa jáne bopsalaý - 16,3 paıyzǵa azaıdy. Qoǵamdaǵy qylmystylyqtyń shynaıy ahýalyn qylmystyń dál osy túrleri kórsetedi. Jalpy qylmystyń tómendeýi elimizdiń barlyq aýmaqtarynda baıqalady», - delingen komıtet málimetinde.