Kamchatkada janartaýǵa shyqpaq bolǵan alty adam kóz jumdy
Zardap shekkenderge kómek kórsetý úshin oqıǵa ornyna tikushaq jiberilgen. Alaıda ol aýa raıynyń qolaısyzdyǵyna baılanysty qona almady, dep habarlaıdy QazAqparat tilshisi BBC agenttigine silteme jasap.
Buǵan deıin jergilikti bılik bes adamnyń qaza tapqanyn málimdegen bolatyn. Al búgin janartaýǵa shyǵý barysynda jaraqat alyp, es-tússiz jatqan taǵy bir adam qaıtys boldy. Qazirgi ýaqytta mert bolǵandardyń jalpy sany alty adamǵa jetip otyr.
Aıta keteıik, 30 tamyzda 12 adamnan turatyn týrıster toby Klıýchevskaıa shoqysy janartaýyna shyǵýǵa attanǵan. 3 qyrkúıekte olar 3,3 myń metr bıiktikke jetip, odan joǵary kóterilýge bet alypty. Shamamen 4,2 myń metr bıiktikke jetken sátte toptyń 5 adamy qulap, barlyǵyn ajal qushqan.
Málim bolǵandaı, topty bastap barǵan úsh gıd bolǵan. Biriniń aıaǵy synǵan, al ekinshisi zardap shekkenderge kómek kórsetýde. Taǵy bir gıd-qyzmetker keshe keshke 3300 metr bıiktikte ornalasqan bazalyq lagerden shyǵyp, zardap shekken topqa bet alǵan. Lagerde órmeleýdi jalǵastyrýdan bas tartqan eki týrıst qalǵan. Olar qutqarýshylardyń kelýin kútýde. Al qalǵandary 4000 metrden astam bıiktikte qalyp otyr. Týrıster ózdiginen túse almaıdy. Óıtkeni, barlyǵy uzaq órmeleý saldarynan jáne ottegi jetispeýshiliginin álisirep qalǵan.
Qosa keteıik, Klıýchevskaıa sopka - Eýrazııadaǵy eń belsendiligi joǵary janartaý. Onyń bıiktigi - 4,8 myń metr.