Qambarata stansasynyń qurylysyna tartylatyn qaryzǵa Qazaqstan kepildik bermeıdi – mınıstrlik

ASTANA. QazAqparat – «Qambarata-1» SES-niń qurylysyna qaryz syrttan qaryz tartylýy múmkin. Energetıka mınıstrliginiń málimeti boıynsha, mundaı amal halyqaralyq jobany qarjylandyrý talaptaryna saı keledi, dep habarlaıdy QazAqparat tilshisi.

«Jobany halyqaralyq jobalyq qarjylandyrý talaptaryna sáıkes iske asyrý josparlanǵan. Onyń sheńberinde qaryz qarajatynyń qajetti kólemin syrttan tartý qamtamasyz etiledi. Sonymen qatar, qazirgi ýaqytta Qazaqstan Respýblıkasy tarapynan memlekettik kepildikter berý kózdelmeıdi», - dep jazylǵan vedomstvonyń QazAqparat saýalyna joldaǵan jaýabynda.

Mınıstrlik mamandary Qyrǵyz eliniń aýmaǵyndaǵy jobaǵa Qazaqstan Respýblıkasy men Ózbekstan Respýblıkasynyń qatysýy byltyr Sholpanata qalasynda ótken Ortalyq Azııa memleketteri basshylarynyń konsýltatıvtik kezdesýi sheńberinde qol jetkizilgen ýaǵdalastyqtar aıasynda iske asatynyn aıtady.

Eske salsaq, 6 qańtarda Bishkek qalasynda Qazaqstan Respýblıkasynyń Energetıka mınıstri Bolat Aqsholaqov, Qyrǵyz Respýblıkasynyń Energetıka mınıstri Taalaıbek Ibraev jáne Ózbekstan Respýblıkasynyń Energetıka mınıstri Jýrabek Mırzamahmýdov «Qambarata GES-1 qurylysy» jobasyn iske asyrý jónindegi jol kartasyna qol qoıǵan edi.

Buǵan deıin Qyrǵyz Respýblıkasynyń Prezıdenti janyndaǵy Ulttyq strategııalyq zertteýler ınstıtýtynyń dırektory Qanatbek Azız «Qazaqstan - Ózbekstan - Qyrǵyzstan» úshtiginiń «Qambar Ata-1» gıdroelektr stantsııasyn birlesip salý jobasynyń keleshegi týraly pikir bildirgen bolatyn.

Ashyq kózderden alynǵan foto