Kamala Harrıs Amerıkany qalaı basqaratynyn aıtty

<p>ASTANA. KAZINFORM — Chıkagodaǵy AQSh Demokratııalyq partııasy ulttyq seziniń sońǵy kúninde Kamala Harrıs prezıdenttikke kandıdat nomınatsııasyn resmı qabyldap, óziniń búkil saıası mansabyndaǵy eń mańyzdy sózdi sóıledi, dep jazady <a href="https://www.bbc.com/russian/articles/crmwe4vl3nzo" target="_blank" rel="noopener">VVS.</a></p>

Harrıs amerıkalyqtardy aldaǵy saılaýdy partııanyń qalaýyna qaramastan «kúıinishti jeńip, aldaǵy joldy aıshyqtaýdyń qundy múmkindigi» retinde paıdalanýǵa shaqyrdy.

«Búgin keshke bizdi ártúrli saıası kózqarastaǵy adamdar baqylap otyr. Men barsha amerıkalyqtar úshin prezıdent bolýǵa ýáde beremin. Bizdi eń joǵary umtylystarymyzdyń aınalasynda biriktiretin prezıdent bolamyn. Basqaratyn jáne tyńdaıtyn prezıdent», — dedi ol.

Harrıs sonymen qatar respýblıkashyl Donald Tramptyń Aq úıge oralýynyń qaýipti saldary týraly eskertti.

«Biz Tramptyń ekinshi merziminiń qandaı bolatynyn bilemiz. Munyń barlyǵy „Joba 2025“ qujatynda kórsetilgen. Kóp jaǵdaıda Donald Tramp ústirt oılaıtyn ushqalaq adam. Alaıda onyń Aq úıge oralýynyń saldary óte aýyr», — dedi AQSh vıtse-prezıdenti.

Onyń aıtýynsha, Tramp eldi keri tartýǵa tyrysady.

«Biraq biz ótkenge oralmaımyz», — dedi ol birneshe ret.

«Elimizdi shyn súıemin. Qaıda barsam da, kimmen kezdessem de, alǵa jyljýǵa daıyn, kelesi qadamǵa jáne Amerıka degen keremet saparǵa daıyn halyqty kóremin», — dedi ol.

Harrıstiń sózi tórt kúndik kongrestiń sharyqtaý shegi boldy. Osy ýaqyt ishinde is-sharada qazirgi prezıdent Djo Baıden, Bıll jáne Hılları Klınton, Barak pen Mıshel Obama, Ókilder palatasynyń burynǵy spıkeri Nensı Pelosı jáne Harrıstiń prezıdenttik básekedegi seriktesi Tım Ýolz sóz sóıledi.