Kamala Harrıs — AQSh prezıdenttigine resmı úmitker

<p>ASTANA.KAZINFORM — Prezıdent Djo Baıden prezıdent saılaýyna túsýden bas tartqannan keıin kóp uzamaı vıtse-prezıdent Kamala Harrıs onyń qoldaýyn qabyl alyp, qarashada ótetin saılaýǵa Demokratııalyq partııadan úmitker bolatynyn málimdedi, dep jazady <a href="https://www.nbcnews.com/politics/2024-election/kamala-harris-running-president-democratic-challengers-vp-biden-rcna162939" target="_blank" rel="noopener">NBC News.</a> </p>

— Prezıdenttiń qoldaýyna ıe bolǵanymdy maqtan etemin jáne jeńiske jetý úshin bar kúshimdi salamyn. Sondaı-aq, demokratııalyq partııany jáne elimizdi biriktirý úshin, Donald Trampty jáne onyń «2025 joba» baǵdarlamasyn jeńý úshin qolymnan kelgenniń bárin jasaımyn, — dedi Kamala Harrıs.

Kamala Devı Harrıs 1964 jyly 20 qazanda Kalıfornııa shtatynyń Oklend qalasynda dúnıege kelgen.

Ákesi — túbi ıamaıkalyq, Stenford ýnıversıtetinde sabaq bergen, al anasy — úndi dıplomatynyń qyzy, qaterli isik aýrýyn zertteýshi bolǵan. 

Sińlisi Maııa — memlekettik saıasatker. 2014 jyly advokat Dýglas Emhoffqa turmysqa shyqqan.

K. Harrıs Govard ýnıversıtetin (1986) jáne Gastıngstegi Kalıfornııa ýnıversıtetiniń zań kolledjin (1989) bitirdi.

Alǵashqy eńbek jolyn Kalıfornııa shtatynyń Alameda okrýginde bastady. 2003 jyly San-Frantsısko okrýginiń prokýrory, al 2011-2017 jyldary Kalıfornııanyń Bas prokýrory bolyp saılandy.

K.Harrıs 2020 jyly Demokratııalyq partııadan prezıdenttikke úmitker retinde usynyldy, biraq praımerızge deıin jarystan bas tartty, Dj.Baıden ony óziniń seriktesi etip tańdap, olardyń kandıdatýrasy 2020 jylǵy saılaýda jeńiske jetti.

2021 jyldan bastap prezıdent Djo Baıden tusyndaǵy AQSh-tyń qazirgi vıtse-prezıdenti. Vıtse-prezıdent retinde K.Harrıs ońtústik shekaradaǵy kóshi-qon, daýys berý quqyǵy jáne túsik tastaý sııaqty máselelermen aınalysty.

Ol Tramptyń qaıta saılanýy áıelderdiń túsik jasatýǵa qol jetkizýin odan ári shekteıtinin eskertip, saılaýaldy naýqanǵa belsendi qatysty.