Kamal Smaıylovtyń murasy máńgi jasaı bersin - Máýlen Áshimbaev
«Kamal Smaıylov – ultymyzdyń rýhanııaty men mádenıeti úshin uly ister atqarǵan dara tulǵa. Búkil ǵumyryn týǵan halqyna qyzmet etýge arnaǵan aǵamyz qazaq ádebıeti men jýrnalıstıkasyn jáne kınosy men televızııasyn damytýǵa zor eńbek sińirdi»
, - dep jazady Senat Spıkeri.
«Qazaqfılm» kınostýdııasyna basshylyq jasaǵan jyldarda ulttyq kıno ónerin buryn-sońdy bolmaǵan jańa bıikke kótergenine toqtalyp, sol kezeńde «Qyz Jibek», «Atamannyń aqyry», «Taqııaly perishte» sııaqty kóptegen shedevrler jaryq kórgenin eske alady.
«Kamal Seıitjanuly qandaı qyzmette bolsa da ultjandylyǵymen jáne tabandylyǵymen tanyldy. Memlekettik teleradıo komıtetiniń tóraǵasy bola júrip, qazaq tilindegi habarlardyń sanyn da, sapasyn da arttyrýǵa basa mán berdi. «Qymyzhana», «Tamasha», «Altybaqan», «Aıtys» sııaqty tól qundylyqtarymyzdy dáripteıtin jobalardyń júzege asýyna uıytqy boldy.
Kamal aǵanyń jetekshiligimen túsirilgen R.Qoshqarbaev, Q.Qaısenov, B.Momyshuly, M.Ǵabdýllın jáne taǵy basqa batyrlarymyz týraly derekti fılmder búginde qazaq televızııasynyń altyn qoryndaǵy qymbat qazynalardyń biri bolyp sanalady», - deıdi Máýlen Áshimbaev.
Kamal Seıitjanulynyń Táýelsizdik alǵan tusta Joǵarǵy Keńes depýtaty retinde egemen elimizdiń eńse tikteýine de úlken úles qosqanyn atap ótti.
«Únemi eldik máselelerdi nazarda ustap, qaıratkerlik pikirin bildirip otyrdy. Sheraǵańmen jazysqan hattarynyń ózi halyq pen bılik arasyndaǵy altyn kópirdiń ozyq úlgisi ekeni sózsiz»
, - dep jazǵan.
Ómiriniń sońyna deıin izinen ergen jas býynǵa jol kórsetip, shákirt tárbıelegen, eli úshin eseli eńbek etken osyndaı eren tulǵanyń ónegeli ómirin keńinen dáripteý – barshamyzdyń azamattyq paryzymyz ekenine nazar aýdarady.
«Mundaı qadam jas býyndy otanshyl, ultjandy bolýǵa tárbıeleıtini anyq. Sondyqtan, aldaǵy ýaqytta bul baǵytta ıgilikti ister kóptep qolǵa alynady dep senemiz. Kamal aǵamyzdyń rýhy shat bolsyn, murasy máńgi jasaı bersin!»
- dep túıindepti Senat Tóraǵasy.
Eske sala ketsek, Máýlen Áshimbaev Aral máselesin halyqaralyq alańdarda birlesip ilgeriletýdiń bereri mol ekendigin aıtqan bolatyn.