Qalyń qar jaýǵan Atyraýda 190 adam qulap, jaraqat alǵan
Atyraý oblystyq aýrýhanasy travmatologııa bólimshesiniń meńgerýshisi Ashat Bısenǵalıevtiń deregine súıensek, keıingi úsh kúnde jaraqat alǵan adamdar kúrt kóbeıgen.
«Bizdiń bólimshege buǵan deıin kún saıyn jaraqat alǵan 30-35 adam júginetin edi. Qalyń qar jaýǵannan keıin jaraqatymen keletin adamdar sany kóbeıip otyr. Máselen, 6 aqpanda 55, 7 aqpanda 70 adamdy qabyldadyq. Búgin, 8 aqpanda túske deıin bólimshege túrli jaraqaty bar 65 adam keldi. Olardyń bári qulaǵannan zardap shekken. Kópshiligi qolyn syndyryp alǵan. Jaraqat alǵandardyń bárine medıtsınalyq kómek kórsetildi. Adamdar dúken men dárihananyń mańynda jıi qulaıdy. Qulaǵan kezde jerdi qolymen tirep, syndyryp alady. Tobyǵy men jelke tusy synǵan turǵyndar da bar», - deıdi Ashat Bısenǵalıev.
Onyń aıtýynsha, zardap shekkender – ártúrli jas ereksheligindegi adamdar. Olardyń arasynda egde jastaǵylar da, jastar da bar.
«Zardap shekken adamnyń synyǵy kúrdeli sanatqa jatqyzylsa, naýqas 2-3 aı emdeledi. Jeńil sanattaǵy synyǵy bar adamdar 1 aıdyń ishinde saýyǵady», - dep málim etti Ashat Bısenǵalıev.
Sondaı-aq, keshe, 7 aqpanda aýrýhananyń travmatologııa bólimshesine kólik qaqqan 3 adam túsken. Zardap shegýshiniń bireýi aýrýhanaǵa jatqyzylǵan. Dárigerlerdiń medıtsınalyq kómeginen keıin 2 adam úıine jiberilgen. Olar em-dom sharasyn óz úıinde jalǵastyrady.
Eske sala ketelik, budan buryn Atyraýdy qalyń qar basyp, kólik qozǵalysy qıyndaǵanyn jazǵan bolatynbyz.