Qaltaǵa pyshaq salyp júrýge bola ma – zańger jaýap berdi

<p>ÓSKEMEN. KAZINFORM &ndash; Zańger Alekseı Bajkov qaltaǵa pyshaq salyp júrýdiń qanshalyqty zańdy ekendigin aıtty.</p>

Qazaqtyń kóne zańynda er kisige bákisiz júrýge bolmaıtyn. Ol endi jaýgershilik ýaqyt. Al qazir zaman basqa. Biraq qaltasyna nemese kólikke pyshaq salyp júretinder áli de bar. Bul qanshalyqty zańdy ekendigin bilý úshin óskemendik zańger Alekseı Bajkovqa júgindik.

«Pyshaqta sýyq qarýdyń sıpattamalary bolmasa, alyp júrýge bolady. Birden basyn ashyp alaıyq, kez kelgen pyshaq sýyq qarýǵa jatpaıdy. Eger bir jaǵdaı bolsa, naqty baǵasyn krımınalıst-sarapshylar beredi. Dese de pyshaq alyp júrýge tyıym salynbaǵanymen, ony qaltaǵa salǵandaǵy maqsatyńyz qandaı? Qalaı bolǵanda da eshkimge qaltaǵa pyshaq salyp júrýge keńes bermes edim. Ásirese, jastarǵa. Sebebi erte me, kesh pe, pyshaqtan bir qıyndyqtar týyndaýy múmkin», - deıdi ol.

Eger polıtsııa qyzmetkerleri kóshede sizdi toqtatyp, qaltańyzdy teksergende pyshaq shyqsa, onda báribir qoıa bermeıdi, tekseris jasaıdy.

«Keıbireýler «kólikte balta salyp júrýge bola ma?» dep surap jatady. Bul jerde de sýyq qarý belgileri bar ma, joq pa, qaraý kerek. Joǵaryda aıtqanymdaı, sońǵy sheshimdi krımınalıst-sarapshylar shyǵarady», - deıdi zańger.