Qalmuhanbet Qasymov Qyrǵyzstannyń Qaýipsizdik Keńesiniń Hatshysymen kezdesti

BІShKEK. QazAqparat - Bishkek qalasynda Qazaqstan Respýblıkasy jáne Qyrǵyz Respýblıkasy qaýipsizdik keńesteri apparattary arasyndaǵy keńeıtilgen josparly konsýltatsııalar ótti, dep habarlaıdy QazAqparat Aqordaǵa silteme jasap.

Qazaqstan Respýblıkasy Prezıdentiniń kómekshisi – Qaýipsizdik Keńesiniń Hatshysy Qalmuhanbet Qasymovtyń jáne Qyrǵyz Respýblıkasy Qaýpsizdik Keńesiniń Hatshysy Damır Sagynbaevtyń tóraǵalyǵymen ótken kelissózderge ortalyq memlekettik organdar basshylary qatysyp, yntymaqtastyqtyń ózekti máseleleri talqylandy.

Taraptar óńirlik qaýipsizdiktiń qazirgi jáne yqtımal qaýip-qaterleri boıynsha pikir almasyp, halyqaralyq terrorızmge jáne dinı ekstremızmge birlesken qarsy áreketti egjeı-tegjeıli qarastyrdy. Onyń ishinde búgingi qalyptasqan ahýaldy eskere otyryp, aldaǵy ýaqytta atalǵan baǵytta úılesimdi jumysty kúsheıtýdiń mańyzdylyǵy aıtyldy.

Sonymen qatar konsýltatsııalar barysynda zańsyz esirtki aınalymymen kúres jáne mıgratsııalyq zańdylyqty buzý boıynsha Qazaqstan men Qyrǵyzstannyń memlekettik organdarynyń yntymaqtastyǵy sóz boldy. Bul baǵyttardaǵy ózara árekettestiktiń qazirgi jaǵdaıyna taldaý júrgizilip, jumysty jaqsartý maqsatynda naqty usynystar jasaldy.

Jumystyń nátıjeleri boıynsha eki eldiń tıisti memlekettik organdaryna naqty tapsyrmalar berildi. Budan basqa, Q.Qasymov pen D.Sagynbaev 2020-2021 jyldarǵa arnalǵan Qazaqstan men Qyrǵyzstan qaýipsizdik keńesteri apparattary arasyndaǵy yntymaqtastyq josparyna qol qoıdy.