Qalmaqqyrǵan tarıhı shaıqasyna arnalǵan kitap jaryq kórdi

PAVLODAR. QazAqparat - Toraıǵyrov ýnıversıtetinde «Qalmaqqyrǵan taýlaryndaǵy arheologııalyq-etnografııalyq zertteýler» atty halyqaralyq ǵylymı-tájirıbelik konferentsııa ótti, dep habarlaıdy pavlodarnews.kz.

Konferentsııanyń plenarlyq otyrysyna Pavlodar oblysynyń ákimi Bolat Baqaýov, belgili ǵalymdar, zııaly qaýym ókilderi, stýdentter men oqýshylar qatysty. Otyrystyń ashylýynda sóz alǵan aımaq basshysy Bolat Baqaýov konferentsııanyń óskeleń urpaqqa tarıhı sanany sińirýdegi mańyzdylyǵyna toqtalyp ótti.

«Halqymyzdyń ejelden kele jatqan tarıhy óskeleń urpaqqa zor taǵylym men ónege beredi. Ótkennen sabaq alý arqyly jarqyn bolashaqqa jol ashamyz. Keleshek urpaqtyń tárbıesinde Otanǵa, tarıhqa degen qurmet mańyzdy oryn alady»,- dedi Bolat Baqaýov. Konferentsııaǵa oraı uıymdastyrylǵan kórmede ýnıversıtet ǵalymdary qurastyrǵan «Serektas shaıqasy» kitabynyń tanystyrylymy ótti. Jınaqta tarıhshy, etnograf ǵalymdardyń «Qalmaqqyrǵan» tarıhı shaıqasy týraly maqalalary toptastyrylǵan. Jınaq avtorlarynyń biri - E.Bekmahanov atyndaǵy tarıh jáne etnografııa ortalyǵynyń dırektory, fılosofııa ǵylymdarynyń kandıdaty, professor Amantaı Qudabaev aldaǵy ýaqytta kitaptyń ekinshi tomy shyǵatynyn jetkizdi.

«Jınalǵan materıaldyń 30 paıyzy ǵana osy jınaqqa endi. Kitap tórt bólimnen turady. Birinshi bólim «Qazynaly qazbalar» dep atalady. Munda arheologııalyq zertteýler toptastyrylǵan. Kelesi «Tarıhtan tábárik», «Bahadúr babalar», «Ańyz ben aqıqat» bólimderinde qazaq-qalmaq shaıqastaryna baılanysty zertteýler, kónekóz qarııalardyń estelikteri, ólketanýshylar men jýrnalıst qaýymnyń maqalalary keltirilgen»,- deıdi Amantaı Qudabaev.

«Osy kitap arqyly biz «Qalmaqqyrǵan» tarıhı oqıǵasynyń qashan, qaı jerde bolǵandyǵyn dáleldep, oǵan qatysqan batyrlardyń esimderin jańǵyrttyq».

Konferentsııada ál-Farabı atyndaǵy Qazaq Ulttyq ýnıversıtetiniń professory Irına Erofeeva, Reseı Ǵylym akademııasynyń ǵylymı qyzmetkeri Vladımır Tepkeev, tarıhshy-ólketanýshy Dáýren Aıashınov, Á.Marǵulan atyndaǵy arheologııalyq ǵylymı-zertteý ortalyǵynyń dırektory, dotsent Vıktor Merts, E.Bekmahanov atyndaǵy tarıh jáne etnografııa ortalyǵynyń dırektory Amantaı Qudabaev sóz sóılep, qazaq-qalmaq shaıqastarynyń tarıh pen ǵylymda alatyn orny týraly baıandama jasady.