Kalıfornııada órt órship barady: myńdaǵan adam úılerin tastaýǵa májbúr boldy
20:46, 05 Tamyz 2021
NUR-SULTAN. QazAqparat – Kalıfornııada tez tarap jatqan órt saldarynan Pleıser jáne Nevada okrýgterinde myńdaǵan adamdardy evakýatsııalap jatyr, 600 gektar jer otqa oranǵan, dep habarlaıdy QazAqparat Reuters-ke silteme jasap.
Pleıser okrýginde kem degende 2 400 adam úıin tastaýǵa májbúr bolǵan, Nevada okrýginde taǵy 4 200 adam evakýatsııalanǵan.
Eki okrýgte de evakýatsııa ortalyǵy jasaqtaldy.
Pleıser men Nevadada 1 400 akr (566 gektar) jer kúıip ketken. Dıksıde 160 shaqyrymǵa jýyq jerdegi órt jalǵasýda. Ondaǵy jalyn 278 myń akr jerdi sharpyǵan. Órt bastalǵan kezden bergi úsh apta ishinde aýmaqtyń tek 35%-ynda ǵana tilsiz jaý aýyzdyqtalǵan.