Kalıfornııada daýyldan 14 adam qaza tapty

ASTANA. QazAqparat - Kalıfornııaǵa kelgen daýyldan 14 adam qaza tapty. Jaǵalaý mańyndaǵy Montesıto aýdanynda bes jasar bala sýǵa aǵyp mert boldy, dep habarlaıdy QazAqparat BBC News agenttigine silteme jasap.

Bala men onyń anasy sý tasqyny kezinde kólikte bolǵan. Joldaǵy adamdar onyń anasyn júk kóliginen shyǵaryp alǵan, biraq balanyń kólikten sýǵa aǵyp bara jatqanyn kórgen. Keıin qutqarýshylar onyń aıaq kıimin tapty, al balany 7 saǵat boıy súńgýirler izdedi.

AQSh ulttyq meteorologııalyq qyzmetiniń deregi boıynsha, 12 saǵatta óńirge 20 sm jaýyn jaýǵan. On myń úı men 100 myń adam jaryqsyz otyr.
Dúısenbi kúni AQSh prezıdenti Djo Baıden Kalıfornııada tótenshe jaǵdaı jarııalady. Turǵyndar evakýatsııalanyp jatyr.
Montesıto Santa-Barbaraǵa jaqyn ornalasqan, munda kóptegen tanymal adamdar turady, sonyń ishinde hanzada Garrı men onyń jubaıy Megan, tanymal telejúrgizýshi Opra Ýınfrı bar.
Buǵan deıin Kalıfornııada daýylǵa baılanysty tótenshe jaǵdaı jarııalandy
Foto: GETTY IMAGES