Qalı Sársenbaıdyń «Shal men shyndyq» atty jańa kitaby jaryqqa shyqty
32 baspa tabaqtan, 600 betten turatyn bul kólemdi eńbektiń tórt bólimi bar. «Sóz sáýlesi» atty alǵashqy bólimi qalamgerdiń ár jyldary jazǵan pálsapalyq oılarynan quralǵan. Sonyń ishinde qoǵamdaǵy alýan túrli oqıǵalardy saraptaı kele, qalamynan shyqqan «Dert pen sert», «Tarıh qalaı qaıtalanady?», «Aqıqat aıtylǵan jerde ózińdi adam sezinesiń», «Bizdi Qadyr qutqaryp júr», «Keńdikti teńdik dep túsinetinder bar», «Dombyra ustaı bilgen bala eldi de ustaı biledi», «Teledıdar toıhana emes», «Ónerdiń túbine ólermendik jetedi» jáne basqa da osyndaı oı salatyn taqyryptardaǵy kósemsózderin oqýǵa bolady. Kelesi betterdi paraqtasaq, «Onyń ary 86 jyly ólip qalǵan», «Sóz adasyp júr», «Kisini kedeılik buzady», «Ónerge salǵan aqsha ólmeıdi» degen oı tolǵamdaryn kezdestiremiz.
Kitaptyń ekinshi bólimi «Oqı otyryńyz» dep atalady. Bul toptamadaǵy «Partııalar aldymen Abaıdy oqysyn», «Shal men sheneýnik», «Túlen túrtkender men túnde kóleńke izdeıtinder», Dástúr saqtalmaǵan jerge jyn-shaıtan úıir», «Dosy joq zaman», «Tulǵa topqa emes, ultqa qyzmet etedi», «Korrýptsııanyń kúretamyryn tilip jiberetin bir ótkir almas kerek» atty jazbalary taqyryptary aıtyp turǵandaı, zamannyń únin, qoǵamnyń tynysyn, adamdardyń beınesin ashyp kórsetetin dúnıeler ekeni daýsyz. Sondaı-aq «Shirkin, shyndyq?!». Siz aqıqatty aıtasyz, biz áli kúnge shyndyqtyń kirispesin jazyp júrgen joqpyz ba?» dep bastalatyn paıymdary qaı oqyrmandy da oı teńizine qaraı jeteleıtini sózsiz.
«Tulǵataný» atty úshinshi bólimde Qazaq eliniń búgini men keleshegi úshin qyzmet jasaǵan, ulttyń rýhanı baılyǵyn saqtap qalý jolynda kúresken qaıratkerler týraly syr shertiledi.
Avtor: «Alash qaıratkerleri qyzmetkerlerdi «biri ultqa jany ashıtyndar da, biri ortalyq ne aıtsa, soǵan bas shulǵı beretin jáı sheneýnikter» dep ekige bólip qaraǵan. Bul pikir kúni búginge deıin mańyzyn joǵaltqan emes. Demek, Tulǵa ultyna jan-tánimen qyzmet etýshi» degen oılarymen bólisedi.
Osy bólimde Beket ata týraly joljazbamen tanysýǵa bolady. Sonymen qatar, Muhtar Áýezov, Sháken Aımanov, Ózbekáli Jánibekov, Zeınolla Qabdolov, Qadyr Myrza Áli, Tumanbaı Moldaǵalıev, Sábıt Orazbaı, Asanáli Áshimov, Ǵazıza Jubanova, Sherhan Murtaza, Aqseleý Seıdimbek, Ospanhan Áýbákiruly, Ázirbaıjan Mámbetov jáne basqa da qazaqtyń tanymal tulǵalary týraly avtordyń ár kezeńde jazǵan maqala, ocherkterin oqýǵa bolady.
Qalamger endi birde «Jýrnalıst bolý ońaı deımisiń?..» dep til qatady.
«Búkpesiz áńgime» atty tórtinshi taraýǵa Qalı Sársenbaıulynyń óner jáne mádenıet qaıratkerlerimen júrgizgen suhbattary toptastyrylǵan.