Qaldyqtardy óńdeýde suryptaý pýnkteri tek 40 paıyzǵa júktelgen

NUR-SULTAN. QazAqparat – Májilistiń jalpy otyrysynda depýtat Abılfas Hamedov turmystyq qaldyqtardy jınaýdaǵy problemany kóterdi, dep habarlaıdy QazAqparat tilshisi.

«Problemalardyń biri qatty turmystyq qaldyqtardy suryptaý men qaıta óńdeýge baılanysty. Jyl saıyn Qazaqstanda 5 mln tonna qatty turmystyq ári qurylys qaldyqtary jınalady. Alaıda suryptaý pýnkteri tek 40 paıyzǵa júktelgen. Óńdeýshi kásiporyndar shıkizattyń budan artyq kólemin qabyldaýǵa ázir, alaıda qatty turmystyq qaldyqtar bólektep jınaý júıesinen ótýi kerek. Bul jumystar elimizde tıisti deńgeıde emes. Al qurylys alańdarynan shyǵarylǵan qaldyqtar óńdelmeı, shuńqyrly jerlerge tógilip keledi», - dedi Abılfas Hamedov Úkimet basshysynyń orynbasary Roman Sklıardyń atyna joldaǵan saýalynda.

Onyń paıymynsha, qaldyqtardyń túrli tıpteri úshin arnaıy konteınerlerdi ornatý qoqysty iriktep jınaýdy jeńildetip, qaıta óńdeýdegi shyǵyndardy azaıtýǵa múmkindik beredi.

«Qazaqstanda 3030 polıgon bar, onyń ishinde qatty turmystyq qaldyqtardyń 600 polıgony ekologııalyq ári sanıtarlyq normalarǵa saı keledi», - dedi depýtat.

Osy oraıda ol atalǵan salada ruqsat berý rásimderin jeńildetý múmkindigin qarastyrýdy surap, sondaı-aq qajetti óndiristerge jer telimderin bólýge qatysty usynys aıtty.