Qaldyqqa arnalǵan konteınerlerge qatysty jańa talaptar engizildi

ASTANA. QazAqparat – 1 shildede Qazaqstanda «Qaldyqtar. Kommýnaldyq qaldyqtardy bólek jınaýdy uıymdastyrý úshin konteıner ornalastyrý alańdaryna qoıylatyn jalpy talaptar» ulttyq standarty qoldanysqa engizildi, dep habarlaıdy QazAqparat tilshisi Qazaqstan standarttaý jáne metrologııa ınstıtýtyna silteme jasap.

QazStandartpen birlesip, 102 standarttaý jónindegi tehnıkalyq komıtet qaldyqtardy basqarý salasyn damytýda jáne qaldyqtardy kádege jaratý men qaıta óńdeý úshin ekologııalyq qaýipsiz ınfraqurylym qurýda mańyzdy qadam bolatyn osy standartty ázirledi.

Jańa standarttyń negizgi talaptary - eldi mekenderde ǵımarattardyń, kóppáterli jáne jeke turǵyn úılerdiń janynda konteıner alańdaryn salý (rekonstrýktsııalaý), sondaı-aq turǵyn jáne qoǵamdyq ǵımarattardan, balalar obektilerinen, sport alańdarynan jáne halyqtyń demalatyn oryndarynan sanıtarııalyq alshaqtyqty qamtamasyz etý. Budan basqa, mamandandyrylǵan kólik úshin yńǵaıly asfalttalǵan kireberis, qurylys jáne iri gabarıtti qaldyqtar úshin jabyny men qorshaýy bar aýdany 12 sharshy metrden kem emes oryndardy qurý kózdeledi

, - dep málim etilgen QazStandart habarlamasynda.

Jańa standartqa sáıkes, qurylǵan alańdarda qaldyqtardyń mynadaı túrlerin bólek jınaýǵa arnalǵan konteınerler ornalastyrylýǵa tıis:

- elektrondy qaldyqtarǵa arnalǵan konteıner

- quramynda synaby bar qaldyqtardy jınaýǵa arnalǵan konteıner

- qaǵaz jáne karton qaldyqtaryna arnalǵan konteıner

- batareıa qaldyqtaryna arnalǵan konteıner

- tamaq qaldyqtaryna arnalǵan konteıner

- shynyǵa arnalǵan konteıner

- plastıkalyq qaldyqtarǵa arnalǵan konteıner.

Qaldyqtardy bólek jınaýǵa arnalǵan árbir konteınerdiń menshik ıesi qazaq jáne orys tilderinde, mynadaı aqparatty tańbalaýy qajet: jınalatyn qaldyqtardyń túrleri kórsetilgen aqparattyq japsyrma/jazba; konteıner menshik ıesi týraly derekter (ataýy, baılanys derekteri); konteınerge qyzmet kórsetetin uıym týraly aqparat.