Qalba taýda Qazaq handyǵynyń 550 jyldyǵyna oraı Baıtaılaq batyrdy eske alýǵa arnalǵan shara ótedi
Josparlanǵan sharalar aıasynda 27 qyrkúıekte Shyǵys Qazaqstan oblysy Jarma aýdany Qalba taýy bókterinde batyrdyń kesenesinde as berilip, quran oqytylady. 29 qyrkúıek kúni Astanada Baıtaılaq batyrǵa arnalǵan ǵylymı-praktıkalyq konferentsııa ótedi jáne shetelden kelgen qazaq ónerpazdarynyń qatysýymen kólemdi kontsert ótedi dep josparlanýda.
Sondaı-aq, osyndaı sharalar Almaty qalasynda da jalǵasyn tabatyn bolady. Qytaıda turatyn belgili ǵalym, qoǵam qaıratkeri Qadys Janábilulynyń bastamasymen ótkeli otyrǵan eske alý sharalary Qytaıdan jáne Mońǵolııadan kelgen belsendi qazaq azamattarynyń kúshimen atqarylmaq. «Batyr babamyz Baıtaılaq qazaq halqynyń Jońǵar shapqynshylyǵyna qarsy ult azattyq kúreste erekshe erlik kórsetip, aty ańyzǵa aınalǵan esimi tutas bir rýly eldiń urany bolǵan aıtýly tulǵa. Sherýshi rýy negizinen Qytaı men Mońǵolııa jerin mekendep qalǵandyqtan Baıtaılaq batyr týraly tarıhı málimetter Qazaqstanda kóp taralmaǵan. Ádette onyń erligi Qabanbaı, Bógenbaı, Jánibek, Naýryzbaı sekildi batyrlarmen birge atalady. Babamyzdyń erligin QR Bilim jáne ǵylym mınıstrligi ǵylym komıtetine qarasty Sh.Ýálıhanov atyndaǵy tarıh jáne etnologııa ınstıtýty resmı tanyp otyr. Er Jánibek ómirden óter shaǵynda ózin aǵasynyń qasyna jerleýdi amanat etken eken. Baıtaılaq pen er Jánibek aǵaly-baýyrly ǵana emes, tulpar minip, tý ustaǵan úzeńgiles batyr, eli, jeri úshin qan maıdanda erligimen tanylǵan dara tulǵalar bolǵan. Búginde Qalba taýynyń baýraıynda Baıtaılaq qorymy dep atalatyn jer ataýy da saqtalǵan. Sol úshin de Qazaq handyǵynyń 550 jyldyǵy qarsańynda batyr babamyzdy ulyqtaý maqsatynda naqty sharalar ótkizý josparlap otyrmyz. Jekelegen belsendi azamattardyń uıymdastyrýmen ótetin eske alý sharalarynyń naqty baǵdarlamasy negizinen daıyn. Batyrdyń zıratyna keseneni Dildáhan Dálel esimdi azamat óz qarajatymen ornatqaly otyr», - deıdi uıymdastyrýshylar alqasynyń múshesi Amantaı Álhanuly. Shara aıasynda 26-28 qyrkúıek aralyǵynda Astanadan Shyǵys Qazaqstan oblysyna jýrnalıster jáne blogerlerge arnalǵan press-týr ótedi. Press-týrǵa qatysýshylar 27 qyrkúıek kúni Shyǵys Qazaqstan oblysy Jarma aýdany Qalba taýy baýraıynda batyrdyń kesenesiniń ashylý rásimine qatysady.