«Qalamqas» kenishindegi órtti sóndirgenderge alǵys aıtýymyz kerek - Abaev

NUR-SULTAN. QazAqparat - Mańǵystaý oblysyndaǵy «Qalamqas» munaı-gaz ken ornynda basyn qaýipke tigip, órtti sóndirgen azamattarǵa alǵys aıtýymyz kerek. «Habar» arnasyndaǵy «Ashyq dıalog» baǵdarlamasynda Aqparat jáne qoǵamdyq damý mınıstri Dáýren Abaev osylaı aıtty, dep habarlaıdy QazAqparat tilshisi.

«Jalpy, munaı óndirý salasynda, ásirese uńǵymalardy burǵylaý kezinde órt qaýpi týyndaýy ábden múmkin. Bul jerde másele tek adamı faktorda emes. Degenmen, adamı faktor bolýy da múmkin. Mamandar maǵan túsindirip bergendeı, burǵylaý kezinde kóp jaǵdaıda gaz óte qatty qysymmen syrtqa shyǵady. Osynyń saldary apatqa alyp keledi. Statıstıka boıynsha, jyl saıyn álemde munaı óndirý nysandarynda myń jarymǵa tarta apat oryn alyp jatady. Olardyń kóbinde órtter shyǵady, munaı tasyp shyǵyp jatady. Baqytymyzǵa qaraı, «Qalamqasta» munaıdyń tasýy oryn alǵan joq», - dedi Dáýren Abaev.

Mınıstrdiń aıtýyna qaraǵanda, órtke qarsy kúreske barlyq kúshter jumyldyryldy.

«Óz ómirin qaýipke tigip, órtpen kúreskenderge barlyǵymyz alǵys aıtýymyz kerek. Eń bastysy, odan zardap shekkender joq. Jaqyn aradaǵy eldimekenderdiń halqyna órt jaǵdaıy eshqandaı qaýip týyndatqan joq», - dedi ol.

Aıta keteıik, 13 naýryzda Mańǵystaý aýdanyndaǵy «MańǵystaýMunaıGaz» AQ-nyń «Qalamqas» munaı-gaz ken ornynda «Sı Bý» ınjenerlik burǵylaý kompanııasy» JShS №8237 uńǵymasyn burǵylaý barysynda gaz-sý qospasy atqylady. Al 25 naýryz kúni saǵat 07:10-da Mańǵystaý oblystyq TJD kezekshi-dıspetcherlik qyzmetine «Qalamqas» ken ornyndaǵy uńǵymadan shyqqan gaz janyp, bıikti 10 metrge deıin jalyn atqylap turǵandyǵy habarlandy.

QR Prezıdenti Qasym-Jomart Toqaev ken ornyndaǵy jaǵdaıdy óz baqylaýyna alyp, Úkimetke tıisti tapsyrmalar júktedi.

Búgin QR Energetıka mınıstrligi órt tolyǵymen sóndirilgenin málim etti.