Qalamqas ken ornynda apattyq jaǵdaı joq - Energetıka mınıstrligi

NUR-SULTAN. QazAqparat - QR Energetıka mınıstrligi kómirsýtekter jáne jer qoınaýyn paıdalaný salalaryndaǵy memlekettik baqylaý departamenti Qalamqas ken ornyndaǵy №8237 uńǵymasynyń qazirgi jaǵdaıyn baıan etti, dep habarlaıdy QazAqparat tilshisi.

№8237 uńǵymasyndaǵy sý men gazdyń anyqtalý sebebin zertteý úshin Qalamqas ken ornynda osy jyldyń naýryz aıynan bastap búginge deıin sarapshylar toby jumys júrgizip jatyr. Ol toptyń quramynda táýelsiz sarapshylar men «NII TBD «KazNIPImýnaıgaz» JShS jobalyq uıymynyń ókilderi bar.

Sarapshylar tobynyń keńesimen №8237 uńǵymasyna baqylaý júrgizilýde. Sonymen birge, №8237 uńǵymasy aýdanyndaǵy 98 uńǵymada zertteý jumystary, 13 uńǵymada geofızıkalyq zertteý, baǵandar keńistigi arasyna monıtorıng júrgizilýde.

Sondaı-aq, jumys josparyna sáıkes, ol aýmaqta uıymdastyrýshylyq-tehnıkalyq jumystar da qolǵa alynǵan. Ol jumysqa gaz plastyn oqshaýlaýǵa qatysty daıyndyq jumystary men gaz plastyn oqshaýlaý boıynsha keshendi jumystarǵa ázirlik bastalǵan.

Habarlanyp otyrǵandaı, 2019 jyldyń 22 mamyrynda bolymsyz gaz ben sýdyń anyqtalǵany baıqalǵan. (№8237 uńǵymasynyń saǵasynan 20 metr jerde bıiktigi 0,4-0,5 metrdeı (nemese 40-50 sm) jáne №8237 uńǵymasynyń saǵasynan 35 metr jerde bıiktigi 0,3-0,4 metrdeı (nemese 30-40 sm).

Atalmysh jaǵdaı boıynsha jedel shtab uıymdastyrýshylyq-tehnıkalyq jumystardy qolǵa alyp, jumys josparyna saı grıfon tıeýdi bastaǵan. Uńǵymanyń saǵasynan qysymdy órshitý júrgizilip, grıfondy qashalaý jumystary júrgizilgen. Yqpal etetin 8 uńǵyma toqtatylǵan.

Departamenttiń habarlaýynsha, №8237 uńǵymasynda apattyq jaǵdaı joq.

Eske sala ketsek, keshe Mańǵystaý oblysyndaǵy Qalamqas ken ornynan grıfon anyqtalǵany habarlanǵan bolatyn.