Qalamgerler joldaýdaǵy túıtkildi máselelerge ún qosty

ALMATY. QazAqparat - Almatyda QR Jazýshylar odaǵy basqarmasynda qalamgerler men aqyndar bas qosyp, memleket basshysynyń joldaýyn talqyǵa saldy, dep habarlaıdy QazAqparat tilshisi.

Zııaly qaýym ókilderi mańyzdy qujatta aıtylǵan bastamalarǵa ún qosyp, túıtkildi máselelerdi sheshý joldaryn usyndy.

QR Jazýshylar odaǵy basqarmasy tóraǵasynyń orynbasary, belgili aqyn, jýrnalıst, fılologııa ǵylymdarynyń doktory Baýyrjan Jaqyptyń aıtýynsha, 2019 jyldyń jastar jyly dep jarııalanýy jastardyń áleýmettik, moraldyq, materıaldyq máseleleriniń sheshimi bolmaq.

Sonymen qatar, odaq aıasynda ótkizilip otyrǵan birqatar sharalardy tilge tıek etti.

«Biz osy kúzde túrkitildes jas ádebıetshilerdiń forýmyn ótkizgeli otyrmyz. Bul shara Oralda ótedi. Oǵan bashqurt, tatar, qyrǵyz, túrikmen, Túrkııa, Makedonııa sekildi túrki tektes halyqtar bar elderden aqyndar shaqyrylady. Bul forým jyl saıyn dástúrli túrde ótkizilip turady. Jas ádebıetshilerdiń semınar keńesteri, múshaıra, ádebı keshterdi ótkizý, festıval uıymdastyrý josparda bar», - dedi aqyn.

Otyrysqa qatysqan ózge de jazýshylar  2019 jyldyń 1 qańtarynan bastap  tómengi jalaqy 42 000 ósetinine qýanyshtaryn jasyrmady.

Sonymen qatar, biraýyzdan muǵalimderdiń, bıýdjettik sala qyzmetkerleriniń, densaýlyq saqtaý, polıtsııa jalaqysyn kóterý bastamasyn qoldaıtyndaryn jetkizdi.

QR Jazýshylar odaǵy basqarmasy tóraǵasynyń birinshi orynbasary Ǵalym Jaılybaı  ekologııaldyq ahýaldy jaqsartý máselesine keńinen toqtaldy.

«Joldaýda jazýshylarǵa qatysty eshteńe joq eken» dep qabyldamaı, tereńirek úńilý kerek. Bul qujat halyqtyń ósýine, halyqtyń tabysy men turmysyn arttyrýyna arnalǵan. Onyń ishinde meniń erekshe nazarymdy aýdartqany ekologııalyq monıtorıng júrgizý máselesi. Astanadan beri demalys oryndarynyń tynysy tarylyp qaldy. Keptelis, aınalasy bótelke. Meniń týǵan aýylymda proton qulady. Jerimiz geptılmen ýlandy. 1989 jyly eń sońǵy ret radıatsııa kólemi qalypty normadan 10 ese artyq bolǵan. Ekologııalyq ahýaldy kúsheıtý - bizdiń aralasatyn  máselemiz», - dedi Ǵalym Jaılybaı.

Aıta ketý kerek, Prezıdent Nursultan Nazarbaev 5 qazanda Qazaqstan halqyna kezekti Joldaýyn jarııa etti.

Strategııalyq qujat elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.