Qalamger Sábıt Dosanovtyń mereıtoıyna arnalǵan shyǵarmashylyq keshi ótti
QR Memlekettik syılyǵynyń laýreaty, «Alash», Reseıdiń Sholohov atyndaǵy Halyqaralyq syılyǵynyń, «Parasat» ordeniniń ıegeri, professor Sábıt Dosanov seksenniń seńgirine shyqty.
Jazýshynyń qurmetine arnalǵan shyǵarmashylyq kesh Abaı atyndaǵy qazaq memlekettik akademııalyq opera jáne balet teatrynda boldy. Keshke zııaly qaýym ókilderi, Almaty qalasynyń ákimi, jazýshynyń sheteldegi qalamdas dostary keldi.
Saltanatty jıynda Almaty qalasynyń ákimi Baqytjan Saǵyntaev quttyqtaý sóz sóıledi. Ol Memleket basshysy Qasym-Jomart Toqaev pen Elbasy Nursultan Nazarbaevtyń joldaǵan quttyqtaýyn oqyp berdi.
«Qurmetti Sábıt Aıtmuhanuly! Sizdi 80 jasqa tolǵan mereıtoıyńyzben quttyqtaımyn! Halqymyz ózińizdi qarymdy qalamger, qoǵamdyq-saıası mańyzdy oqıǵalarǵa oı-pikirin bildirip otyratyn qaıratker retinde jaqsy biledi.Uzaq jylǵy shyǵarmashylyq eńbegińiz óz jemisin berip keledi. Sizdiń qalamyńyzdan shyqqan kórkem dúnıeler búgingi zamanmen úndestik taýyp, ǵasyrlar toǵysyndaǵy kókeıkesti máselelerdi kóterýimen erekshelenedi. Aldaǵy ýaqytta da oqyrmandaryńyzdy tartymdy týyndylaryńyzben qýanta berýińizge tilektestigimdi bildiremin. Sizge zor densaýlyq, áýletińizge amandyq pen qut-bereke tileımin», – delingen Prezıdent Qasym-Jomart Toqaev joldaǵan jedelhatta.
Elbasy Nursultan Nazarbaevtyń quttyqtaý hatynda jazýshynyń oqyrmandar iltıpaty men qurmetine bólenip, keń tynysty kesek týyndylarynyń ulttyq ádebıettiń, sonyń ishinde kórkem prozanyń órkendep, órisiniń keńeıýine eleýli úles qosqany aıtylady.
Sonymen qatar, QR Parlamenti Májilisiniń Tóraǵasy Nurlan Nyǵmatýlın men QR Mádenıet jáne sport mınıstri Aqtoty Raıymqulova quttyqtaý hat joldady.
Sondaı-aq, jazýshyǵa Resseı, Ózbekstan, Armenııa, Ázerbaıjan, Túrik, Qyrǵyzstan elderinen arnaıy kelgen belgili jazýshylar men jýrnalıster jyly lebiz bildirdi.
Sábıt Dosanovtyń «Ekinshi ómir», «Jıyrmasynshy ǵasyr» romandaryna oqyrman qaýym joǵary baǵasyn bergen. «Jer taǵdyry», «Seksen bestiń kóktemi», «Adaspańdar adamdar», «Totem pod chadroı», «Tenzor stennogo kýrgana», «Syńsyp ushqan syńar aqqý» shyǵarmalary jazýshyny ómirdiń ózekti máselelerin kótergen, ótkir kórkem sóz sheberi retinde tanytty. Jazýshynyń dramatýrgııa salasynda da eleýli eńbekteri bar. Máselen, «Daýyl», «Erteń bıýro», «Tozań sheńberi» pesalary el teatrlarynda sahnalanyp júr. Qazirgi qazaq ádebıetiniń damýyna eleýli úles qosqan Dosanovtyń týyndylary shet elderde de laıyqty baǵasyn alýda.
Dosanov 1940 jyly 12 qańtarda Qostanaı oblysy, Amangeldi aýdany, Baıǵabyl aýylynda týǵan. Ál-Farabı atyndaǵy Qazaq ulttyq ýnıversıtetin bitirgen. Eńbek jolyn respýblıkalyq gazet-jýrnaldardan bastaǵan.
1985 – 1989 jyldary KSRO Ádebıet qorynyń qazaq bólimshesinde dırektor,
1991 – 1995 jyldary respýblıkalyq halyq shyǵarmashylyǵy jáne mádenı qyzmet kórsetý ortalyǵynyń bas dırektory,
1996 – 1997 jyldary «Qaınar» baspasynyń bas redaktory qyzmetterin atqardy.
Shyǵarmashylyq kesh kontserttik baǵdarlamaǵa ulasty.