Qalalardyń ekologııalyq ahýalyn jaqsartý jumysy qalaı júrgizilýde
«Esepti qorshaǵan ortany qorǵaý salasynan bastasam. Mınıstrlik ulttyq jáne óńirlik sıpattaǵy segmentter, sondaı-aq olardy sheshý dárejesi boıynsha ekologııalyq problemalarǵa tekserý júrgizgen bolatyn. Óńirlik ekologııalyq problemalardy taldaý atmosferalyq aýanyń lastanýy jáne qaldyqtardy basqarý máseleleri neǵurlym ótkir problemalardyń biri ekendigin kórsetti», - dedi Maǵzum Myrzaǵalıev OKQ ótken halyqqa esep berý kezdesýinde.
Mınıstrdiń aıtýynsha 2019 jyly ekologııalyq monıtorıngtiń nátıjesinde Aqtóbe, Atyraý, Nur-Sultan, Almaty, Shymkent, Óskemen qalalarynda atmosferalyq aýanyń lastanýynyń joǵary deńgeıi anyqtalǵan.
«Zııandy zattar shyǵaryndylarynyń jalpy deńgeıi 2018 jyldyń deńgeıinde turaqtandy. Bul shamamen - 2,5 mln tonna. Tógindiler kólemi 2018 jyly 1,1 mln tonnadan 2019 jyly 0,98 mln tonnaǵa deıin nemese 10 paıyzǵa tómendedi. Osy kórsetkishkerge tabıǵat qorǵaý sharalaryn iske asyrý jáne kásiporyndardyń ekologııalyq taza tehnologııalardy engizý arqyly qol jetkizdik. 2019 jyly ekologııalyq jaǵdaıdy jaqsartýǵa tabıǵat paıdalanýshylarmen 172 mlrd teńge ınvestıtsııalandy. Bul 2018 jylǵy deńgeıden 7 paıyzǵa artyq (161 mlrd. teńge)», - deıdi ol.
Maǵzum Myrzaǵalıev mysaly, Pavlodar oblysynyń «Qazaqstan alıýmınııi» kásipornynda nemis tehnologııasynyń elektrofıltri iske qosylyp, bir metrge 50 mılıggramǵa deıin qaldyq shańdy tazartýdyń joǵary deńgeıin kórsetip, jaqsy nátıjeler berip jatqanyn aıtady. Sondaı-aq, osy aıdyń sońynda ekinshi fıltrdi ornatý josparlanýda.
«Jentekteý tsehynda shyǵaryndylardy jalpy qysqartý jylyna 2,4 myń tonnany quraıdy. Qaraǵandy oblysynda «Qazaqmys Smeltıng» kásipornyna qaraıtyn Jezqazǵan mys balqytý zaýyty ozyq tehnologııany qoldana otyryp, jańa kúkirt qyshqyly tsehyn salýdy jáne paıdalanýǵa berýdi josparlaýda. Bul kúkirt dıoksıdiniń shyǵaryndylaryn 3 ese, ıaǵnı 60 myńnan 20 myń tonnaǵa deıin tómendetýge múmkindik beredi», - dedi ol.