Qalalardy sapaly josparlaý Berekeli bastama platformasynda talqylanady
Qazaqstan Respýblıkasynyń Indýstrııa jáne ınfraqurylymdyq damý mınıstri Qaıyrbek Óskenbaev QR Prezıdenti janyndaǵy ótken dóńgelek ústel barysynda elimizdegi qalalar aýmaǵyn sapaly josparlaý standarttary jobasyn usyndy.
«Halyqtyń ál-aýqatyn arttyrý, ómir súrý sapasy men deńgeıin jaqsartý asa mańyzdy mindet. Qalalardyń turaqty túrde ósýi qala keńistigin qalyptastyrýdyń jańa tásilderin, jańa qurylys reglamentterin qatań saqtaýdy talap etedi. Ókinishke qaraı, qazir elimizde qalalar retsiz, kóbinese jurtshylyqtyń pikirin jáne qalanyń damý perspektıvalaryn eskermeı salynýda», - dedi Q. Óskenbaev «Qalalyq keńistikti qalyptastyrýdyń jańa tásilderi týraly» atty dóńgelek ústel otyrysynda.
Osy oraıda ol qalalardaǵy ózgeristerdi ýrbanıster men turǵyndardyń pikirin eskere otyryp júrgizý óte mańyzdy ekenin atap ótti. Dál osy maqsatta Qazaqstannyń ýrbanıster qaýymdastyǵymen birlese Berekeli Bastama daýys berý platformasy iske qosylady. Portalda qalanyń ár turǵyny ınfraqurylymdy jaqsartý boıynsha óz usynystaryn bere alady. Jobalardy mamandar ǵylymı turǵyda qarastyryp, eń úzdikteri daýys berý úshin portalda jarııalanady. Sosyn daýys berýdiń qorytyndylary boıynsha qarjylandyrý jáne iske asyrý úshin basymdyqtar aıqyndalady.
«Qazirgi jaǵdaı jańasha sharttardy talap etedi. Ozyq halyqaralyq tájirıbeni eskere otyryp, qala qurylysyn josparlaý, jańa ýrbanıstik tásilderin damytý júıelerin transformatsııalaý qajet. Memleket basshysy 2021 jylǵy Joldaýynda qalalardy keshendi salýdyń jańa standarttaryn ázirleý qajettigin atap kórsetken bolatyn. Osyǵan baılanysty mınıstrlik qalalar aýmaqtaryn sapaly josparlaý standarttarynyń redaktsııasyn ázirlep, kelisý úshin jergilikti atqarýshy organdar men uıymdarǵa joldady», - dedi mınıstr.
Onyń aıtýynsha, jańa standarttar yqsham qurylysty jobalaý men engizýdiń, tartymdy jáne jaıly qoǵamdyq keńistik qalyptastyrýdyń, jaıaý júrginshiler men velosıped ınfraqurylymyn damytýdyń qarapaıym ári túsinikti etalony bolady.
«Osy maqsatta biz elimizdiń iri eldi mekenderiniń qalalyq ınfraqurylymyn damytý tujyrymdamasynyń pılottyq jobalaryn iske asyrýdy josparlap otyrmyz», - dedi vedomstvo basshysy.
Sonymen qatar Qaıyrbek Óskenbaev QR Indýstrııa jáne ınfraqurylymdyq damý mınıstrligi Qazaqstannyń ýrbanıster qaýymdastyǵymen birlesip, Aqtaý jáne Atyraýdyń qala keńistikterin transformatsııalaý jumystaryn bastaǵanyn habarlady.