Qalaǵa qonys aýdaratyn aýyl halqynyń sany artyp keledi

ASTANA. QazAqparat - Aǵymdaǵy jyldyń alǵashqy 6 aıynda 44 myń adam aýyldan qalaǵa qonys aýdardy. Bul týraly búgin Astana Agroforum-2018 respýblıkalyq keńesinde QR Aýyl sharýashylyǵy mınıstriniń keńesshisi Sáken Qalqamanov aıtty, dep habarlaıdy QazAqparat tilshisi. 

«Búginde aýyldardaǵy ahýal mynadaı bolyp otyr. 2017 jyly 49 795 adam aýyldan ketti. Bul búgingi kúnniń resmı statıstıkalyq deregi. 2016 jyldyń ishinde aýyldan ketken adamdardyń sany 84 myńǵa jetti. Al osy jyldyń birinshi jartyjyldyǵynyń ishinde 44 myń adam qalaǵa qonys aýdardy. Aýyl mektebin bitiretin túlekter arasynda «aýyl ómiriniń keleshegi joq» degen túsinik basym. Olardy qalalar qyzyqtyrady. Biraq, ol jaqta eshkim de kútip turǵan joq. Bul túsinikten aryltý úshin aýyl ómirin qaladan kem qylmaıtyndaı júıeli ári salaaralyq ádis kerek. Ókinishke oraı, jastar búginde jańa ári progressıvti otandyq aýyl sharýashylyǵynyń shynaıy ósim núktesin kórmeı otyr», - dedi ol jıynda «Aýyl - el besigi» jobasyn tanystyra kele.
S.Qalqamanovtyń aıtýynsha, Aýyl sharýashylyǵy mınıstrligi elimizdiń úkimettik emes uıymdarymen birlesip, aýyl sharýashylyǵy salasy qyzmetkerleriniń bedeli men áleýmettik mártbesin arttyrýǵa nıet etip otyr. Osyǵan oraı «Rýhanı jańǵyrý» aıasynda «Aýyl - el besigi» arnaıy jobasynyń jarǵysy ázirlengen.
«Qazirgi ýaqytta oqýshylardy otanshyldyqqa tárbıeleý, fılmder men serıaldar túsirý, aýyl jetekshileri men jumysshylaryn qaıta daıyndyqtan ótkizý, ıdeıalardy ilgeriletýde BAQ-pen jumys isteý sııaqty túrli 60 shara josparlanyp otyr», - dedi mınıstrdiń keńesshisi.
Eske sala ketsek, Elbasy Joldaýynda «Aýyl - el besigi» atty joba usynylǵan bolatyn.