«Qaladan qoqys shyǵarý toqtatyldy»: Aqtaý ákimdigi máselege túsinik berdi
Búgin birqatar BAQ-ta Aqtaýda qatty turmystyq qaldyqtardy shyǵarý belgisiz merzimge toqtatylǵany habarlandy. Oǵan sebep - «Caspiy Operating» JShS kólikteriniń tańerteńgi saǵat 07.00-de polıgon aýmaǵyna kirgizilmeýi.
«Osyǵan baılanysty qoqys shyǵarý belgisiz merzimge toqtatyldy. Qalyptasqan jaǵdaı úshin aldyn ala keshirim suraımyz», - delingen edi «Caspiy Operating» JShS málimdemesinde.
Biraq Aqtaý qalasy ákimdiginiń baspasóz qyzmeti tústen keıin bul másele sheshilgenin málim etti.
«Aqtaý qalasynda turǵyndardan turmystyq qatty qaldyqtardy shyǵarý úshin tarıf alynyp tastalǵan. Osyǵan baılanysty halyqtan qoqystardy kómý tarıfin jınaý boıynsha másele týyndady.
Qazirgi tańda Aqtaý kalasynyń Turǵyn úı sharýashylyq bólimimen jańa tarıfti bekitý baǵytynda, ıaǵnı, turmystyq qaldyqtardy shyǵarý, tasymaldaý, suryptaý jáne kómý boıynsha jumystar júrgizilip jatyr. Jańa tarıf Qazaqstan Respýblıkasy Ádilet mınıstirliginen qorytyndy alǵannan keıin máslıhattyń kezekti sessııasynda bekitiledi. Jańa tarıf bekitilgenshe burynǵy tarıfpen kómý baǵytynda qabyldaýshy polıgon men shyǵarýshy mekeme arasynda kelisim jasaldy», - delingen málimette.
Ákimdiktiń baspasóz qyzmetinen atap ótkendeı, turmystyq qatty qaldyqtardy tasymaldaýshy mekeme ázirshe jumysyn burynǵy keste boıynsha jalǵastyrady.