Qalada tórtinshi meshit salý tıimsiz - Arhımed Muhambetov

QOSTANAI. QazAqparat – Oblys basshysy Qostanaı qalasyndaǵy tórtinshi meshittiń qurylysyna qatysty pikir bildirdi, dep habarlaıdy QazAqparat.

Búgingi oblys ákiminiń esep berý jıynynda Qostanaı qalasynyń «Altyn Arman» shaǵyn aýdanynyń turǵyndary atynan meshit qurylysyn bastaý týraly suraq qoıyldy. Saýal qoıýshy aqsaqaldyń sózinshe, «Altyn Arman» shaǵyn aýdanynyń turǵyndaryna ortalyqtaǵy meshitke kelý qıyndyq týǵyzady.

«Bul másele týraly naqtylap óteıin. Oblys ortalyǵynda úsh meshit jumys istep tur. 3000 adam qabyldaıtyn ortalyq meshit pen Abaı kóshesindegi qalalyq meshit bar. Oǵan qosa jaqynda «Aqmeshit» paıdalanýǵa beriledi. Sondyqtan qalada taǵy bir meshit salý bizge tıimsiz. Sebebi, ony kútip-ustaý, kommýnaldyq tólemder, ımamdarǵa jalaqy tóleý sııaqty máseleler bar. Al aýdan ortalyqtary men aýyldarǵa meshit qajettiligi bar. Sonyń biri – irgedegi Áýlıekól aýyly. Al eger demeýshi tapsańyzdar, Qazaqstan musylmandary dinı basqarmasy arqyly salýǵa bolady», - dep túsindirdi oblys basshysy.

Arhımed Muhambetov óńirde tarıhı-mádenı murany saqtaý, nasıhattaý jáne kıeli obektilerdiń ınfraqurylymyn damytý jumystary jalǵasyp jatqanyna toqtaldy.

«2019 jyly 214 arheologııalyq eskertkish qalypqa keltirildi, qarjylandyrý 4 mıllıon teńgeden asady. Jangeldın aýdanynda Qazybaı Áýlıe kesenesinde taǵzym etýge arnalǵan úı, qobyzshy Tilep Aspantaıulynyń jerlengen jerinde kesene salyndy. B.Maılın aýdanynda batyr Jabaǵy Ipanulynyń jerlengen jerinde qorshaýlar men qaqpalar ornatylyp, kirme joly greıdermen tegisteldi. Qostanaıda «Aq meshit» kıeli obektisinde ǵylymı-qalpyna keltirý jumystary júrgizilýde», - dedi Arhmed Muhambetov.

Sonymen qatar kıeli nysandardyń, onyń ishinde jergilikti mańyzy bar 9 jańa kıeli orynnyń tıisti ınfraqurylymyn júrgizý jumystary 2020 jyly jalǵasady.