Qalada epıdemıologııalyq ahýal turaqtana bastady - Baqytjan Saǵyntaev

ALMATY. QazAqparat - Almaty ákimi Baqytjan Saǵyntaev keshe ótken qala aktıviniń otyrysynda Memleket basshysynyń Joldaýyn iske asyrý máseleleri boıynsha epıdemıologııalyq ahýaldy turaqtandyrý jáne qalanyń densaýlyq saqtaý júıesin damytý sharalary týraly aıtty, dep habarlaıdy QazAqparat tilshisi.

Qasym -Jomart Toqaev halyqqa Joldaýynda koronavırýs pandemııasymen kúresý, eń aldymen halyqty vaktsınalaý jáne profılaktıkalyq ekpeniń Ulttyq kúntizbesin oryndaý mindetterin qoıdy.

Almatyda 200-ge jýyq ekpe pýnkti jumys isteıdi. Vaktsınanyń birinshi komponentin 875 myń adam, ekinshisin 748 myń almatylyq saldyrdy.

Vaktsınalardyń úzdiksiz jetkizilýi qamtamasyz etildi. Qalaǵa barlyǵy 992 myń doza jetkizildi.

«Qabyldanǵan sharalardyń nátıjesinde Almatyda sanıtarlyq-epıdemıologııalyq ahýal turaqtana bastady. Dert deńgeıiniń tendentsııasy tómendep keledi. Búginde biz almatylyqtardyń táýliktik juqtyrý deńgeıiniń ótken aptalarmen salystyrǵanda 300 adamǵa azaıǵanyn baıqadyq», - dedi Baqytjan Saǵyntaev.

Sonymen qatar, ol jedel járdemge qońyraý shalý sany 4 myńnan 2,4 myńǵa deıin azaıǵanyn aıtty. Naýqastardy aýrýhanaǵa jatqyzý kórsetkishi de eki ese tómendedi.

«Degenmen, aýyr zardaptar men ólimge ákeletin jańa indetter qaýpi áli de bar. Sondyqtan ınfektsııanyń aldyn alý, epıdemıologııalyq zertteýler júrgizý, juqtyrýdyń jappaı tizbegin boldyrmaý strategııalyq mindet bolyp qala beredi», - dep atap ótti Almaty ákimi.

Ol medıtsınalyq qyzmetterdiń barlyq spektrindegi sapaly qyzmettiń mańyzyn qadap turyp aıtty. Ambýlatorııalyq-emhanalyq kómek júıesi skrınıngtik jáne profılaktıkalyq tekserýlerdi jalǵastyrýy tıis.

Sonymen qatar, ol qalanyń densaýlyq saqtaý júıesiniń ınfraqurylymyn jaqsartý jumystary jalǵasa beretinin aıtty. Sońǵy eki jylda, pandemııaǵa qaramastan, eki modýldik aýrýhana men 1080 tósek oryndy ınfektsııalyq aýrýhananyń fılıaly salyndy. Qaladaǵy 18 iri aýrýhanada ottegi stantsııalary ornatyldy. Kárizdik aǵyndar men medıtsınalyq qaldyqtardy zalalsyzdandyrý júıeleri jańardy.

Qazirgi ýaqytta ana men balanyń densaýlyǵyn qorǵaý úshin tıptik qabyldaý bólimi jáne taza bólmeler kesheni ári zamanaýı operatsııalyq blogy, reanımatsııa bólimi bar qurylys jobasy ázirlenip jatyr. Sondaı-aq, jańa dárigerlik ambýlatorııalyq-emhanalyq mekemeler salý josparda.

«Ákimdikke qarasty qalanyń medıtsınalyq uıymdarynda 19 myńnan astam medıtsına qyzmetkeri jumys isteıdi. Kadr tapshylyǵyn azaıtý úshin jol kartasy júzege asyrylýda, 120 rezıdentti óte tapshy medıtsınalyq mamandyqtar boıynsha oqytý úshin jergilikti bıýdjetten qarjy bólindi», - dedi Baqytjan Saǵyntaev.