Qala turǵyndaryn balaǵattaǵan joqpyn - Şýche ákimi áleýmettik jelide beıneúndeý jarııalady

KÓKShETAÝ. QazAqparat - Şýche qalasynyń ákimi Oljas Nurmaǵambetov áleýmettik jelide tikeleı efır arqyly ótken eseptik kezdesýde qala turǵyndaryna balaǵat sóz aıtyp, qorlamadym dep aqtaldy, dep habarlaıdy QazAqparat tilshisi.

Býrabaı aýdany ákimdiginiń Instagram paraqshasynda jarııalanǵan úndeýde Şýche qalasynyń ákimi Oljas Nurmaǵambetov qala turǵyndarynyń atyna jaǵymsyz jáne balaǵat sózder aıtýǵa jol bermegenin málimdedi.

«Qurmetti qala turǵyndary! Sizderge úndeý jasap otyrǵan men, Şýche qalasynyń ákimi Oljas Nurmaǵambetov. Keshe Býrabaı aýdany ákimdigi tikeleı efır ótkizdi. Onda men Şýche qalasy ákimdigimen 2023 jyldyń birinshi jartyjyldyǵynda atqarylǵan jumystar týraly esep berdim. Tikeleı efır barysynda jáne odan keıin de meniń tarapymnan turǵyndardyń atyna jaǵymsyz jáne balaǵat sózder aıtylmaǵanyn habarlaımyn», - dedi qala ákimi beıne úndeýde.

Býrabaı aýdany ákimdiginen atap ótkendeı, qazirgi kezde osy másele boıynsha qyzmettik tekseris júrip jatyr.

Aıta ketsek, Şýche qalasynyń ákimi Oljas Nurmaǵambetovtyń Instagram jelisinde ótkizgen tikeleı efırde turǵyndardy balaǵattap jibergeni týraly tirazh.kz basylymy jazǵan edi. Basylym jarııalaǵan vıdeodan ákim kómekshisiniń tikeleı efırdi óshirýge áreketi sátsiz bolǵanyn kórýge bolady.

«Translıatsııa aıaqtalǵanǵa deıin Şýche turǵyndarynan ákimge saýaldar tústi, alaıda Nurmaǵambetov olarǵa jaýap bermedi. Baıandamasyn oqyp bolǵan qala basshysy tikeleı efır aıaqtaldy dep, jeli qoldanýshylaryna ursa jóneldi. Memleket basshysy birneshe ret aıtqan halyq aldyndaǵy ashyqtyqtyń ornyna Oljas Nurmaǵambetov biz jarııalaı almaıtyn basqa tildi qoldandy», - dep jazady basylym.

Eske sala ketsek, budan buryn Qosshy turǵyndarynyń kóbi elorda emhanalaryna júginýge májbúr ekenin jazǵan edik.