Qala ómirin qaıta qurylymdap, ózgertý qajet – BUU

NUR-SULTAN. QazAqparat – Qalalar pandemııa oshaǵynda qaldy. Aýrý tirkelgen oqıǵalardyń shamamen 90 paıyzy – qalada. Bul kóbine halyqtyń tyǵyz ornalasýymen ǵana emes, qala ómirin uıymdastyrý, mundaǵy adamdardyń ómir salty, olardyń qaıda jumys istep, qalaı áreket etýine baılanysty bolyp otyr. Bul týraly BUU Bas hatshysy Antonıý Gýterrısh aıtty, dep habarlaıdy QazAqparat BUU jańalyqtary saıtyna silteme jasap.

«Negizgi aýyrlyq qalaǵa túsken. Olardyń kóbinde densaýlyq saqtaý júıesine kóp salmaq túsken, sýmen jabdyqtaý jáne sanıtarııa qyzmeti jóndi emes, ózge de prolemalary tolyp jatyr», - dedi Bas hatshy.

Búginde ǵalamshar turǵyndarynyń 55-ten astam paıyzy qalada ómir súrip jatyr. Qala turǵyndarynyń shamamen 24 paıyzy adamdar tyǵyz turatyn, qarapaıym sanıtarlyq-gıgıenalyq jaǵdaıy joq aýdandarda tirshilik etýde. Kóptegen adamdar jumys orny, mektep, balabaqsha, tipti azyq-túlik dúkenderden alys jerde turyp jatyr. Búginde qala turǵyndarynyń kóbinde turǵylyqty jerinen 400 metr radıýsta qandaı da bir qoǵamdyq ǵımarattary bolmaı otyr. Osynyń barlyǵy pandemııaǵa baılanysty aýyr daǵdarysqa ushyrady.

Ekonomıkalyq shyǵynǵa tap bolǵan da osy – qala. Álemdik JІÓ-niń 80 paıyzy qalada. Álemdegi kóptegen kásiporyndar jumysyn toqtatty, meıramhanalar men ózge bıznes jabyldy, mıllıondaǵan adam úıde oqshaýlanyp qaldy.

«Qala álemin qaıta oılastyryp, ózgertetin ýaqyt keldi. Qazirgi pandemııadan qalyptasqan jaǵdaıǵa beıimdeletin sát kelip jetti», - dep málim etti BUU-nyń Bas hatshysy.

Ol úsh baǵytta áreket etýge keńes bergen: qaladaǵy teńsizdik kólemin qysqartý, jergilikti bılik pen qala turǵyndarynyń áleýetin nyǵaıtý jáne barlyq turǵyndar úshin turaqty ári ádil damý jaǵdaıyn jasaý.

«Búginde bizdiń qalaı turyp jatqanymyzdy, qalaı ózara árekettesip, qalalarymyzdy qalaı salyp jatqanymyzdy oılastyratyn múmkindik bar. «Ýrbanızatsııa álemindegi COVID-19» taldaý qujatynyń máni osynda», - dep atap ótti Bas hatshy.