Qala qurylysynda únemdi ári áleýmettik nátıje beretin nysandar salynýy kerek - sarapshy
«Qazaqstanda qala turǵyndary jyl saıyn shamamen 250 myń adamǵa ósip keledi. Bul óz kezeginde jalpy el boıynsha kórsetkishten eki ese joǵary. Osy oraıda bul kórsetkishtiń tórtten úsh bóligi elimizdiń iri qalalaryna tıesili. Atalǵan kórsetkish jyl saıyn Qyzylorda, Oral, Qostanaı sııaqty qalalardy qurýmen birdeı. Eger biz ınfraqurylymǵa qaraıtyn bolsaq, onda qosymsha qajetti ınfraqurylymǵa 1,1 trln teńge kerek bolady. Bul rette joldan bastap, mektep, aýrýhana jáne basqa da nysandardyń qurylysy qamtylýy tıis. Osyǵan qajetti baspana kólemin qosatyn bolsaq, 1,7 trln teńge shamasynda qarajat kerek. Bul turǵyda jalpy 3 trln teńgege jýyq qarajat shyǵyp otyr. Osy jaǵdaı qalalarǵa mıgratsııalyq qysymdy baıqatady», - dedi E. Áýkenov «Qalalyq keńistikti qalyptastyrýdyń jańa tásilderi týraly» atty dóńgelek ústel otyrysynda.
Onyń paıymynsha, tek ǵylymı qadamdar elimizdegi qalalarda turaqtylyqty, olardyń damýy men ál-aýqatynyń teńgerimin qamtamasyz etedi.
«Bul turǵyda qurylys jumystaryn áleýmettik ári ekonomıkalyq nátıje beretin jerlerde júrgizý kerek. Atap aıtqanda, kúnine 600 adamdy qabyldaıtyn 30 mlrd teńgege sport keshenin salýdyń tıimdiligi tómen. Dál sol 600 adam baratyndaı 300 mln teńgege de, ıaǵnı 100 ese arzan qarajatqa da sport keshenin salýǵa bolady. Elimizdegi qalalarda osyndaı sheshimderge ekpin qoıylýy kerek. Qarajat jaǵynan únemdi jáne eleýli áleýmettik nátıje beretin nysandar qajet», - dedi Erlan Áýkenov.
Budan buryn habarlanǵandaı, QR Indýstrııa jáne ınfraqurylymdyq damý mınıstri Qaıyrbek Óskenbaev Qazaqstanda qalalar aýmaǵyn sapaly josparlaý standarttary engiziletinin aıtty.
Sonymen qatar, Qazaqstannyń ýrbanıster qaýymdastyǵymen birlese Berekeli Bastama daýys berý platformasy iske qosylady. Portalda qalanyń ár turǵyny ınfraqurylymdy jaqsartý boıynsha óz usynystaryn bere alady. Jobalardy mamandar ǵylymı turǵyda qarastyryp, eń úzdikteri daýys berý úshin portalda jarııalanady.