Qala qurylysy týraly kodekstiń jobasy talapqa saı emes – Memleket basshysy

<p>ASTANA. KAZINFORM &ndash; Memleket basshysy Qasym-Jomart Toqaev Úkimettiń keńeıtilgen otyrysynda Qala qurylysy týraly kodeksti qaıta muqııat qarap, jetildirýdi tapsyrdy.</p>

«Elimizdi ekonomıkalyq-áleýmettik damytý isinde mańyzdy ról atqaratyn qurylys salasynyń tıimsiz basqarylýy óte ózekti másele bolyp tur. Mysaly, jobalardyń qunyn smetalyq esepter arqyly anyqtaý ádistemesi álemdik standarttarǵa saı emes. Investorlar ýaqytyn, qarajatyn jáne jumysqa degen qulshynysyn joǵaltyp, aqyry qurylysqa ruqsat beretin qujattar kóp talap etilmeıtin elderge ketip qalady. Úkimet halyqaralyq tájirıbeni negizge ala otyryp, ınvestorlar úshin jobalyq-smetalyq qujattardy bekitý tártibin barynsha jeńildetý kerek», - dedi Qasym-Jomart Toqaev.

Memleket basshysy osydan bir jarym jyl buryn álemdegi ozyq tájirıbege saı keletin Qala qurylysy týraly kodeks ázirleýdi tapsyrǵanyn eske saldy.

«Biraq meniń atyma birqatar sarapshylar men kásipkerlerden ótinishter kelip jatyr. Olardyń aıtyp jatqan shaǵymdary mynadaı: qazirgi Kodekstiń jobasy qoıylǵan talapqa saı kelmeıdi, burynnan bar normalar usynylǵan, jańa tásilder men sheshimder joq. Sondyqtan, Kodekstiń jobasyn qaıtadan muqııat qarap, jetildirý qajet», - dedi Prezıdent.

Aıta keteıik, Úkimet úıinde qaıta jasaqtalǵan Úkimettiń keńeıtilgen otyrysy ótip jatyr.