Qala kúninde nekelerin qıǵan birde-bir jup ajyraspaǵan

ASTANA. QazAqparat - Astanada 38 jup bir jerde nekelerin qıdy. «Jappaı úılený» dep atalyp ketken merekelik sharaǵa bıyl on jyl tolyp otyr, dep xabarlaıdy QazAqparat tilshisi.

Búgingi shara barysynda jas jubaılar júrek formasynda jasalǵan músinniń astymen ótip, «Atameken» etno-memorıaldy kesheninde ornalasqan eń bıik týdyń minberine kóterildi. Sol jerde ózderiniń arman-tilekterin sharlarǵa jazyp, áýege ushyrdy. Merekelik shara aıasynda syılyqtar men júldeler oınatyldy. Bas júlde - Túrkııa men Býrabaıǵa joldama jáne teledıdar. Jas jubaılar dástúr boıynsha ózderiniń arman-maqsattaryn 2008 jyldan beri saqtalyp kele jatqan tilekter kitabyna jazdy. Shara sońynda AHAJ qyzmetkerleri jas jubaılarǵa neke qııý týraly kýálikterin tabystady. Nekesin qıǵandardyń ishinde 68 jastaǵy turǵyn da bar.

«Bıyl «jappaı úılený» jobasyna - 10 jyl. Osy ýaqyttyń ishinde 500-den astam jup nekelerin qıyp, shańyraq kóterdi. Osy otbasylarynda 2000-nan astam sábı dúnıe keldi. Uıymdastyrýshylardyń sózine qaraǵanda, osy ýaqyt aralyǵynda dál qala kúni nekelerin qıǵan birde-bir jup ajyraspaǵan", - delingen ákimdiktiń resmı xabarlamasynda.

Búgingi sharaǵa 10 jyl buryn nekesin qıǵan jup ta qatysty.