Qala kóshelerin qar basty: Óskemende kesheli beri qar tolassyz jaýyp tur
Óskemende sońǵy eki kúnde qar qalyń tústi. Bul jol qozǵalysyn qıyndatyp, tańerteńnen jumysqa asyqqan halyq kólik keptelisinde turýǵa májbúr boldy.
- Ózim Jibek matalar kombınaty yqshamaýdanynda turamyn. Tańerteń Sátbaev dańǵylynda kepteliste turyp, jumysqa keshigip qaldym. Jol durys tazalanbaǵan. Qar tazalap jatqan tehnıkalar jol jónekeı óte az ushyrasty, - deıdi Nurdáýlet esimdi qala turǵyny.
Al Óskemen qalasy ákimdiginen turǵyndar men kólikterdiń qaýipsiz qozǵalysyn qamtamasyz etý úshin «Taza Óskemen» KMK tehnıkalary tartylǵanyn, joldy tazalaý jumystarynyń kesheli beri úzdiksiz júrgizilip jatqanyn málim etti.
- Túngi ýaqytta qar tazalaý tehnıkalary jumysqa shyǵyp, negizgi magıstraldardy, jol aıryqtary men kóshelerdi tazalaýǵa jumyldyryldy. Bul jumystar qazir de jalǵasyp jatyr. Jaıaý júrginshilerge arnalǵan aýmaqtar men aıaldamalar da tazartylýda. Jolǵa kóktaıǵaqqa qarsy materıaldar tógilip jatyr, - dep habarlady ákimdikten.
«Taza Óskemen» KMK-de barlyǵy 97 tehnıka bar. Memlekettik satyp alý arqyly jasalǵan sharttarǵa sáıkes qum – 2 000 tekshe metr, janar-jaǵarmaı materıaldary – 200 tonna, kóktaıǵaqqa qarsy materıal – 1 500 tonna kóleminde alynǵan.
- Búkil qalany birden qardan tolyǵymen qardan tazartyp shyǵý múmkin emes. Sondyqtan halyqtan túsinistik tanytýdy suraımyz. Eger qandaı da bir yqshamaýdanda másele ýshyǵyp jatsa dıspetcherlik qyzmetke 8 777 331 85 36 telefony arqyly qońyraý shalýǵa bolady.
Sondaı-aq turǵyndardan arnaıy tehnıkanyń qardy tazalaýyna kedergi keltirmes úshin kólikti turaqqa talapqa saı qoıý qajettigin eskertemiz, - delingen málimette.
Eske salsaq, osyǵan deıin elimizdiń basym bóliginde boran soǵyp, qar jaýatyndyǵy habarlanǵan.