Qala ǵana emes, ár aýyl mektebine kamera qoıylyp, dabyl batyrmasy ornatylady
Bilim nysandarynyń qaýipsizdigi máseleleri QR Premer-Mınıstriniń orynbasary Tamara Dúısenovanyń tóraǵalyǵymen ótken keńeste talqylandy.
Jıynǵa ortalyq memlekettik organdardyń ókilderi men oblys ákimderiniń orynbasarlary qatysty.
Búginde bilim nysandary mańyndaǵy jol qaýipsizdigi ınfraqurylymyn jaqsartýǵa baılanysty óńirlerde tıisti jol kartasy bekitilgen.
Onyń aıasynda mektepter, balabaqshalar, qosymsha bilim berý uıymdary mańynda baǵdarshamdar, jol belgilerin ornatý, jaıaý júrginshiler trotýarlaryn jasaý sekildi birqatar sharalar qamtylǵan.
Іshki ister mınıstriniń orynbasary Igor Lepehanyń keltirgen málimetinshe, 13 myńnan asa jalpy bilim mekemesiniń (65%) mańynda barlyq tıisti talaptar saqtalǵan.
Kórsetkishti jaqsartý úshin bıyl jáne kelesi jyly 28 myńnan astam sharany qolǵa alý josparlanyp otyr.
Bıyl ázirge 570 nysannyń aınalasynda tıisti jumystar aıaqtaldy.
«Batys Qazaqstan, Qostanaı, Shyǵys Qazaqstan jáne Abaı oblystarynda jol qaýipsizdigi ınfraqurylymyn jaqsartýǵa baǵyttalǵan sharalarmen qamtylǵan nysandar sany 10-ǵa da jetpeıdi», – dedi Igor Lepeha.
Qabyldanyp jatqan sharalar týraly oblys ákimderiniń orynbasarlary da baıandady.
«Bekitilgen jol kartasynda kórsetilgen merzimniń saqtalýyna basa mán bergen jón. Jaz mezgili tez óte shyǵady. Sondyqtan tıisti jumystardy atqarýǵa jaıly merzimdi barynsha tıimdi qoldaný kerek», – dep atap ótti Tamara Dúısenova.
Keńeste sondaı-aq bilim nysandarynyń qaýipsizdik talaptaryna sáıkestigine qatysty da sóz qozǵaldy. Oqý-aǵartý mınıstrligi bıyl tıisti erejege ózgerister engizgen bolatyn.
Oǵan sáıkes, kontıngenti 100 adamnan asatyn barlyq bilim mekemesinde beınebaqylaý kameralary jedel basqarý ortalyqtary nemese aýdandyq polıtsııa bólimderine qosylyp, dabyl batyrmalary ornatylýy kerek.
Buǵan deıin talap tek qalalar men aýdan ortalyqtaryna tıesili bolatyn.
Al 700-den asa adam qabyldaıtyn mekemelerde týrnıketter ornatylyp, kúzet qyzmetterimen kelisimi bolýy shart.
Osyǵan sáıkes, ár óńir qaýipsizdik júıesimen qamtý týraly jumys jospary bekitýde. Jospar ázirge Aqmola, Qaraǵandy, Qyzylorda, Abaı, Mańǵystaý, Jambyl, Pavlodar, Shyǵys Qazaqstan jáne Soltústik Qazaqstan oblystarynda ǵana qabyldanǵan.
Jıyn barysynda jaqynda Pavlodar oblysyndaǵy mektepte bolǵan jaǵdaı da sóz boldy.
Oqý-aǵartý mınıstrliginiń ınfraqurylymdy damytý departamenti dırektorynyń mindetin atqarýshy Marlen Qasenovtyń sózinshe, zań júzinde bilim mekemelerine kirgizýge tyıym salynǵan zattardyń tizimi bekitilgen, óńirler atalǵan tizimge sáıkes talaptardyń saqtalýyn qamtamasyz etýi tıis.
«Oqý-aǵartý, ishki ister mınıstrlikteri ákimdiktermen birge beınebaqylaý kameralaryn, dabyl batyrmalaryn, týrnıketterdi qamtamasyz etý jumysyn kúsheıtýi qajet. Balalarǵa qaýipsiz orta qalyptastyrýda barlyq múmkindikti paıdalanýymyz kerek», – dep atap ótti Tamara Dúısenova.
Vıtse-premer sondaı-aq, múddeli memlekettik organdarǵa bilim berý mekemelerindegi qaýipsizdikti qamtamasyz etý úshin qosymsha sharalar qabyldaý jaǵyn qarastyrýdy tapsyrdy.