Kákeı Jańjýńuly - Altaı shyńyndaǵy óshpes iz

ASTANA. QazAqparat -  QR Ulttyq akademııalyq kitaphanasynda qazaqtyń kórnekti aqyny, qazaq dıasporasy ádebıetiniń damýyna eleýli úles qosqan qaıratker, ustaz aqyn Kákeı Jańjýńulynyń týǵanyna 70 jyl tolýyna arnalǵan «Altaı shyńyndaǵy óshpes iz» atty dóńgelek ústel ótti.          

Sharaǵa aqynnyń Astana qalasyndaǵy shákirtteri men úzeńgiles ádebıetshi dostary, jerlesteri jáne zııaly qaýym ókilderi qatysty.  Ónerpazdar aqyn óleńine jazylǵan ánderdi oryndap, jyrlaryn jatqa  oqydy.

Kákeı Jańjuńuly 1947 jyly Mońǵolııanyń  Baıan-Ólgıı aımaǵy, Bulǵyn eldimekeninde dúnıege kelgen. Almatydaǵy Abaı atyndaǵy Qazaq pedagogıkalyq ınstıtýtyn bitirgen soń týǵan aýlynyń orta mektebinde oqytýshy, dırektor qyzmetterin atqarady. 1982-1993 jyldar aralyǵynda  Mońǵolııadaǵy qazaq ádebıetiniń bólimshesin basqarady, «Shuǵyla» ádebı jýrnalynyń bas redaktory bolǵan.

Mońǵolııadaǵy qazaq orta mektepterine arnap ádebıet oqýlyǵyn daıyndaǵan ádisker ǵalym, aıtys óneriniń qanat jaıýyna, aýyz ádebıetiniń úlgilerin jınaýǵa jáne  etno án óneriniń tobyn quryp, halyqqa nasıhattaýda ólsheýsiz úles qosqan. Mońǵolııadaǵy qazaq ádebıeti keńesin basqarǵan jáne Mońǵolııa Jazýshylar odaǵy syılyǵynyń laýreaty. Ol talaı jasty ádebıet degen kıeli álemge tartyp, onyń qyr syryna baýlyǵan edi. Aqynnyń til, ádebıet, tarıh, etnografııa, óner salasyndaǵy biliminiń telegeı teńiz tereńdigine talaı jandar tánti boldy. Qalamynan týǵan onshaqty jyr jınaqtary men ázil-syqaq áńgimeleri, qazaq jáne mońǵol tilderinde jarııalanǵan.

Shyǵarmalary: «Jaýqazyn»,  «Maýsym», «Jebe», «Qosh bol, kóktem!», «Men - Qazaqpyn», «Jumaqqa aparar jol». Altaı qazaqtarynyń arasynan shyqqan aǵartýshy aqyn Ahyt Úlimjiuly aqynnyń shyǵarmalar jınaǵyn qurastyrdy (1991, 1994, Q. Qalıasqarulymen birge).

1993 jyly ushaq apaty saldarynan mezgilsiz qaza tapqan aqynnyń artynda qundy ádebı murasy men qazaq rýhanııaty úshin jasaǵan eńbegi qaldy. Atajurty ony «Baram, apa, kóktemde» degen áni arqyly jaqsy tanıdy.