Kaır qalasynda Abaı eskertkishi ashyldy
«Abaı eskertkishi Kaır ortalyǵyndaǵy eń kórikti jerlerdiń biri «Erkindik jáne dostyq» saıabaǵyna qoıyldy.
Sharaǵa Mysyr Arab Respýblıkasy syrtqy ister, halyqaralyq qatynastar jáne mádenıet mınıstrlikteriniń ókilderi, dıplomatııalyq korpýstyń músheleri, mysyrlyq jetekshi BAQ jýrnalısteri, qoǵam qaıratkerleri, sondaı-aq, Mysyrda oqıtyn jáne turatyn qazaqstandyq azamattar qatysty», - delingen Qazaqstannyń Mysyrdaǵy Elshiligi taratqan xabarlamada.
Saltanatty rásimde Qazaqstannyń Mysyrdaǵy Elshisi ári osy ıdeıanyń bastamashysy bolǵan Berik Aryn, Kaır gýbernatorynyń orynbasary Muhammed Aıman, sondaı-aq osy istiń demeýshisi jáne músin avtory sóz sóıledi.
Elshi óz sózinde Abaıdyń qazaq jáne álemdik ádebıetke qosqan úlesine toqtala kelip, onyń 150 jyldyq mereıtoıyna oraı ıÝNESKO halyqaralyq uıymynyń 1995 jyldy «Álemdegi Abaı jyly» dep jarııalaýy aqyn talanty men eńbeginiń álemdik deńgeıde moıyndalýynyń naqty aıǵaǵy ekendigin atap ótti. Al, Qazaqstannyń Táýelsizdiginiń 25 jyldyǵyna oraı uly oıshylǵa arnalǵan eskertkish-bıýstiniń Elordamen baýyrlas Kaır qalasynda qoıylýy - eki el halyqtary arasyndaǵy kópjyldyq dostyqtyń beriktigin dáleldeıdi, dedi ol.
Óz tarapynan Kaır gýbernatorynyń orynbasary «Abaı eskertkishiniń Mysyr astanasynyń ortalyǵynda ashylýy - ol megapolıs úshin qazaq jáne mysyr halyqtarynyń rýhanı-mádenı jaqyndyǵyn bildiretin aıtýly oqıǵa» dep atap ótti. Onyń aıtýy boıynsha Kaır gýbernatorlyǵy uly qazaq halqynyń perzentine eskertkish ornatý jaıyndaǵy ıdeıany qýana qarsy alyp, onyń júzege asyrýda barynsha múmkindikter jasady. Keıinirek sóz alǵandar Abaı shyǵarmalaryndaǵy gýmanıstik ıdeıalardyń ózektiligi búgingi kúni arta túsetindigin aıtty.
Shara sońynda Mysyrda oqıtyn qazaqstandyq stýdentter Abaı lırıkalyq óleńderin oryndady. Sonymen qatar, qonaqtarǵa arab tiline aýdarylǵan Abaıdyń «Qara sózderi» men óleńder jınaǵy syıǵa tartyldy.
Osy rette, atalǵan eskertkish-bıýstiń Kaırdegi QR Elshiliginiń qoldaýymen mysyrlyq metsenat, Qazaqstan men Mysyr dostyǵy qaýymdastyǵynyń múshesi doktor Hýseın Ál-Shafııdiń qarajatyna qoıylǵandyǵyn, al bıýstiń avtory qoltýmalary Kaırden basqa Máskeý, Sankt-Peterbýrg, Qazan jáne Tashkent qalalarynda ornatylǵan belgili mysyrlyq skýlptor Ýsama Ál-Serýı bolǵandyǵyn atap ótý kerek.
1998 jyldan beri mysyrlyq kóshelerdiń biri Abaı atymen atalady, al Elordanyń ortalyq kósheleriniń birine mysyrlyq belgili jazýshy jáne ádebıettanýshysy Taha Hýseınniń esimi berilgen. Búginde qazaqtyń uly aqyny ári aǵartýshysy Abaıdyń eskertkishteri Máskeý, Beıjiń, Tashkent, Vıtebsk, Tegeran, Ystambul jáne Býdapeshtte ornatylǵan.