Qaǵaz júzinde qujat talap etý áli de saqtalyp otyr - Prezıdent
«Tsıfrlandyrý - memlekettik saıasattyń uzaq merzimdi basymdyǵy. Men jaqynda arnaýly komıssııanyń otyrysyn ótkizdim. Aldymyzda turǵan jańa mindetterdi aıqyndadyq. Biz tsıfrlandyrý qarqynyn esh báseńdetpeýimiz kerek. Bul úrdis barlyq salany qamtýǵa tıis.
Birneshe mysal keltireıin. Qazir aqparattyq bazalardyń arasynda baılanys joq. Sonyń saldarynan qaǵaz júzinde qujat talap etý úrdisi áli de saqtalyp otyr. Ulttyq keńestiń múshesi Lázzat Qojahmetova jáne Ýaıs Ersaıynuly osy máselege toqtaldy. Máselen, elektrondy úkimet bazasyna Eńbek jáne halyqty áleýmettik qorǵaý mınıstrligi kórsetetin qyzmet túrleri engizilgen. Onda ataýly áleýmettik kómek nemese kópbalaly anaǵa tólenetin járdemaqy alatyn azamattar týraly málimet bar. Soǵan qaramastan jergilikti atqarýshy organdar jáne bilim berý mekemeleri turǵyndardan mór basylǵan qaǵaz anyqtama qajet etedi», - dedi QR Prezıdenti.
Memleket basshysynyń dereginshe, bıyl HQKO-lar osyndaı 2 mıllıonnan astam qujat bergen.
«Qazirgi tsıfrlandyrý dáýirinde munyń esh qajeti joq. Qarapaıym máseleni memlekettik organdar ózderi qıyndatyp otyr. Elektrondy úkimettiń bazasyna ákimdikter, Bilim jáne ǵylym mınıstrliginiń aqparattyq júıelerin qosý kerek. Sonda Halyqqa qyzmet kórsetý ortalyqtarynyń jumysyn jeńildetemiz. Azamattardyń ýaqytyn únemdeımiz», - dedi Qasym-Jomart Toqaev.
QR Prezıdenti qujat aınalymyn jáne is júrgizýdi tsıfrlandyra bergen jón ekendigin basa aıtty.
«Qazir elimizde eńbek sharttaryn esepke alýdyń biryńǵaı júıesi birtindep engizilip jatyr. Bul júıe eńbek kitapshalarynan bas tartýǵa jáne qaǵazbastylyqtan qutylýǵa múmkindik beredi. Degenmen, jumys berýshilerdiń kóbi áli kúnge deıin qyzmetkerlerinen eńbek kitapshasyn, jeke paraǵy men jazbasha ómirbaıanyn tapsyrýdy talap etedi. Azamattardyń buǵan narazylyq bildirýi oryndy. Mundaı eski tásilderden arylý qajet», - dedi Memleket basshysy.