Qaǵaz eńbek kitapshalary qoldanysta qalady – Eńbek vıtse-mınıstri
Onyń sózine qaraǵanda, Biryńǵaı elektrondy eńbek bırjasy arqyly bir jarym aıdyń ishinde 15 myń adam ózderiniń mamandyqtary men tájirıbelerine saı keletin jumys tapty. Búginde elektrondy bırjada 8 myńnan astam túıindeme men 30 myńǵa jýyq bos jumys oryndarynyń aqparaty ornalastyrylǵan.
Belgili bolǵandaı, qazan aıynan bastap Astana, Almaty, Pavlodar jáne Shymkent qalalarynda Biryńǵaı elektrondy eńbek bırjasy qanatqaqty jobasy iske qosyldy.
«Biz aıtyp otyrǵan Eńbek bırjasynda búgingi tańda 15 myń azamat óziniń jumysyn tapty. Sol arqyly aldaǵy jyldan jumys tapqan kezde, ıaǵnı jumys berýshi men qyzmetke ornalasýshy arasynda elektrondy túrde eńbek sharty jasalady dep maqsat qoıyp otyrmyz. Osy oraıda elektrondyq qoltańba qoldanylyp, atalǵan elektrondy eńbek sharty júıe arhıvinde qalady», - dedi vıtse-mınıstr Úkimet úıinde ótken baspasóz máslıhatynda.
S. Jaqypovanyń atap ótýinshe, búginde qoldanystaǵy «eńbek kitapshalary tsıfrlandyrylady jáne barlyǵyn osy formatqa aýystyrý kerek» degen maqsat qoıylyp otyrǵan joq.
«Qazirgi kezeńde Eńbek bırjasynda jańadan jasalǵan shart tek elektrondy túrde iske asyrylady dep aıtyp otyrmyz. 2025 jylǵa deıin elektrondy eńbek bırjasy ózin damyta túsedi. Al qolda júrgen eńbek kitapshalary qalady. Negizi erteń zeınetke shyqqanda, ózińizdiń eńbek ótilińizdi rastaıtyn sol eńbek kitapshasy bolady», - dedi ol.
Budan buryn habarlanǵandaı, ótken aptada Eńbek jáne halyqty áleýmettik qorǵaý mınıstri Tamara Dúısenova eńbek kelisimsharttaryn elektrondy formatqa kóshirý jaıynda aıtqan edi.
«Biryńǵaı elektrondy eńbek bırjasy bazasynda jumysshy profılin júrgizý jáne eńbek kelisimsharttaryn esepke alý júıesi qurylatyn bolady. Eńbek kelisimsharttaryn elektrondy formatqa kóshirý qaǵaz eńbek kitapshasyn alyp tastaýǵa múmkindik beredi», - dep atap ótken edi mınıstr.