Kafedegi jarylys: Oralda qylmystyq is boıynsha aldyn ala tyńdaý boldy
Atalmysh kafede jarylys pen órt saldarynan úsh adam qaza taýyp, taǵy altaýy jaraqat alǵan edi. Osyǵan oraı kafeni jalǵa alýshy Meńdibek Ýálıevke QR QK 292-baby 3-bóligine (eki jáne odan kóp adamnyń ólimine soqtyrǵan órt qaýipsizdigi erejelerin buzý) sáıkes aıyp taǵyldy.
Sot otyrysynda aıyptalýshynyń advokaty Tamara Sársenova saraptama qorytyndylary gaz ballony jarylysynyń naqty sebepterin dál anyqtamaǵandyqtan, atalmysh qylmystyq isti prokýratýraǵa qosymsha tergeý júrgizýge qaıtarýdy ótindi. Ol basqa adamdardy kýáǵa tarta otyryp, qosymsha saraptama taǵaıyndaý kerektigin, M.Ýálıevtiń qylmystyq emes, ákimshilik quqyqbuzýshylyq jasaǵanyn aıtty. Sonymen qatar M.Ýálıevtiń asyraýynda kámeletke tolmaǵan úsh balasy bar ekenin eskerip, qamaýda ustaý bultartpaý sharasyn úı qamaǵyna aýystyrýdy surady.
Jábirlenýshiler men olardyń advokaty Aqgúl Qarasaeva qorǵaý tarapynyń ótinishimen kelispedi. Sýdıa Varvara Dmıtrıenko taraptardy tyńdaı kele, advokat T.Sársenovanyń ótinishin qanaǵattandyrýsyz qaldyrdy.
Basty sot talqysy 19 maýsym kúngi saǵat 16.00-ge belgilendi.
Eske sala keteıik, budan buryn Oral kafesindegi jarylysqa baılanysty jalǵa alýshynyń qamaýǵa alynǵanyn jazǵan bolatynbyz.