Kadrlyq rezervke alynǵan pedagog mektepke konkýrssyz dırektor bolyp taǵaıyndalady

<p>ASTANA. KAZINFORM — «Bilimdegi ózgeristerdiń 1 000 kóshbasshysy» jobasyna qatysyp rezervke alynǵan qarapaıym pedagog shalǵaıdaǵy aýyl mektebine konkýrssyz dırektory bolyp taǵaıyndalady. </p>

Bul týraly búgin atalǵan joba qatysýshylaryna sertıfıkat tapsyrý rásiminde Oqý-aǵartý mınıstrligi Orta bilim berý komıtetiniń tóraǵasy Qanybek Jumashev aıtty.

Foto: Vıktor Fedıýnın/Kazinform

«Qazaqstanda 2023 jyly tuńǵysh ret bilim berý salasynda «Bilimdegi ózgeristerdiń 1 000 kóshbasshysy» jańa jobasy bastalǵan bolatyn. Bul joba Prezıdenttik jastar kadrlyq rezervi sııaqty bilim berý salasynda kadrlyq rezervti qalyptastyrýǵa baǵyttalǵan. Buryn bilim berý júıesinde mektepterdiń, bilim berý uıymdarynyń basshylaryn taǵaıyndaý konkýrs arqyly jáne negizinen mamandardyń biliktiligine, jınaǵan eńbek ótiline qaraı júzege asyryldy. Biraq, álemdik tájirıbeni zertteı kele baıqaǵanymyz, Eýropa elderinde, AQSh-ta bilim berý uıymdarynyń basshylaryn taǵaıyndaý arnaıy daıyndyqtan ótkennen keıin ǵana júzege asyrylady. Osyny eskere kele Oqý-aǵartý mınıstrligi arnaıy baǵdarlama jasap, 4 satydan ótetin oqýdy uıymdastyrdy», — dedi ol.

Onyń atap ótýinshe, byltyr bul jobaǵa mektep dırektorlarynyń 8 myńnan astam orynbasary qatysty. 4 satydan ótken 207 adam kadrlyq rezervke alyndy. Al olardyń 170-i mektep dırektory bolyp taǵaıyndaldy.

Foto: Vıktor Fedıýnın/Kazinform

«Olardyń basqa mamandardan aıyrmashylyǵy kadrlyq rezervke alynǵan maman konkýrssyz basshylyqqa taǵaıyndalady. Rezervten dırektorlyq laýazymǵa taǵaıyndalǵan pedagogqa «joǵary deńgeıdegi basshy» degen arnaıy sanat beriledi. Olardyń jalaqysy 2 esege deıin ósedi. Bul jobanyń maqsaty — basqarý júıesin kúsheıtý, sol arqyly bilim sapasyn arttyrý», — dedi komıtet tóraǵasy.

Qanybek Jumashevtiń dereginshe, bıyl jobaǵa 13 myńnan astam qatysty. Onyń ishinde 376 adam kadrlyq rezervke ótti. 

«Jobanyń bıylǵy aıyrmashylyǵy qarapaıym pedagogtardyń da qatysýyna múmkindik berdik. Olar mektep dırektorynyń orynbasary laýazymyna konkýrssyz taǵaıyndalady. Sonymen qatar, shalǵaı aýyldardaǵy mektepterde kadr jetispeıdi. Olarǵa dırektor bolyp baratyn mamandardyń da úlesi az. Sondyqtan, biz kadrlyq rezervke engen qarapaıym pedagogterdi shalǵaı aýyldaǵy mektepke dırektor bolamyn dese, konkýrssyz negizde taǵaıyndaımyz. Kadrlyq rezervke engen pedagogter bilim salasyna jańa lep ákeledi dep otyrmyz», — dedi ol.

Buǵan deıin habarlaǵanymyzdaı, Qazaqstanda Prezıdenttiń kadrlyq rezervine irikteý erejesi ózgertildi.